A Escola Provincial de Gaitas de Ourense abre un prazo de matrícula especial con motivo do seu 40 aniversario
Por Europa Press / Redacción | OURENSE | 22/09/2024 | Actualizada ás 17:56
Con motivo do seu 40 aniversario, a Escola de Gaitas da Deputación de Ourense abriu unha matrícula especial, polo que, aínda que o curso académico comece o primeiro de outubro para as especialidades de gaita, percusión, canto e pandeireta, manterán a posibilidade de matriculación ao longo do que resta deste 2024 e durante 2025.
Segundo informou o goberno provincial, o importe da mesma é de 40 euros e no caso de varios familiares próximos, o primeiro matriculado pagará 40 euros e os restantes, 15 euros.
A filosofía da Escola de Gaitas, sinalou o seu director, Xosé Lois Foxo, mantivo como eixo un "ensino encamiñado a dignificar" o instrumento, de tal forma que á escola acoden estudiosos de toda Galicia e da península, mesmo con inscricións de diferentes nacionalidades.
