Josep Borrell: "A carta na que México esixía desculpas a España pola colonización non se contestou para evitar polémicas inútiles"

O que foi Ministro de Asuntos Exteriores español e agora Alto Representante da Unión Europea para Asuntos Exteriores, Josep Borrell, explicou que a carta enviada por México en 2019 na que se esixían desculpas a España polas violencias durante a colonización, non se contestou para "evitar polémicas inútiles e unha escalada da confrontación dialéctica cun país irmán". Así o recoñeceu este xoves durante a conferencia de prensa ofrecida no Foro A Toxa, no Grove, onde será galardoado co Premio Jospe Piqué. "Eu era o Ministro de Asuntos Exteriores de España cando chegou a carta. Así que se hai un responsable de que non se contestase, non foi o Rei, como lle ouvín a algún deputado. O Rei é politicamente irresponsable", lembrou.

Nesta liña, remarcou que a política exterior a marca o Goberno "e eu era parte". Fíxose así, continuou, "coa mellor intención de evitar polémicas inútiles e a escalada dunha confrontación dialéctica cun país irmán como é México". "E esa é a mensaxe que lle pasei aos meus interlocutores mexicanos, nos que vin unha absoluta disposición a superar este problema, reforzar lazos e traballar por un futuro común", destacou. Antes das preguntas a xornalistas, durante a súa intervención, Borrell, que asistiu á toma de posesión da nova presidenta de México, Claudia Sheinbaum, transmitiulle os seus "mellores desexos" no seu novo mandato.

O alto representante e vicepresidente da Comisión Europea, Josep Borrell (1d), á súa chegada á primeira xornada do Foro da Toxa-Vínculo Atlántico, no Eurostars Gran Hotel A Toxa, a 3 de outubro de 2024, na Toja, Pontevedra | Fonte: Elena Fernández