Arco Iris solicita ao TSXG manter o "bloqueo eólico" en Galicia
Por Europa Press / Redacción | SANTIAGO DE COMPOSTELA | 08/01/2025 | Actualizada ás 12:12
A organización ecoloxista Arco Iris dirixiu un escrito ao Tribunal Superior de Xustiza de Galicia (TSXG) para insistir na necesidade de manter "o bloqueo das novas licenzas de parques eólicos en Galicia".
Segundo informa, a comunidade galega "xa alcanza unha porcentaxe de xeración de renovables superior ao 74%", obxectivo fixado para o ano 2030 no contexto da Unión Europea, e engade que "máis do 70% da superficie de Galicia está considerada como de alta sensibilidade ambiental, na que está completamente desaconsellada a instalación destes parques".
Nun comunicado, Arco Iris explica que en 2023 a rexión xerou "un 75,3% de electricidade a partir de fontes de orixe renovable, coa eólica como a primeira fonte de xeración galega cun 38,1%". Sinala, ademais, que a produción hidráulica "duplicouse".
A organización ecoloxista recalca que dita taxa de xeración "manterase estable de manter o actual despregamento de parques eólicos na nosa comunidade, sen que exista o risco a medio e longo prazo de problemas na relación xeración / demanda". Por iso, insta ao TSXG a "continuar co bloqueo de novas solicitudes de parques eólicos en Galicia".
