Dúas mulleres, de 53 e 78 anos, evacuadas ao CHUAC tras un choque frontal na N-6 ao seu paso por Bergondo

Dúas mulleres foron evacuadas ao CHUAC nas últimas horas tras rexistrarse unha colisión frontal entre vehículos na N-6, no termo municipal de Bergondo. O primeiro aviso por mor deste accidente foi pouco antes das 21.30 horas da noite de onte. Segundo a información recollida polo CIAE-112 Galicia, produciuse unha colisión frontal no quilómetro 581 da N-6, cunha persoa atrapada no interior dun dos coches implicados.

Os xestores do 112 Galicia pasaron a información ao Servizo de Urxencias Sanitarias de Galicia-061, aos Bombeiros de Betanzos, á Garda Civil de Tráfico e á Agrupación de Voluntarios de Protección Civil de Bergondo. Os servizos sanitarios mobilizaron dúas ambulancias de soporte vital básico e o equipo da PAC de Sada. Finalmente trasladaron a unha muller de 53 anos de idade, B.H.S., e a outra muller de 78 anos, S.A.P., ao Complexo Hospitalario da Coruña. A dotación de bombeiros tivo que facer uso do material de excarceración para liberar a unha das vítimas, que estaba atrapada nun dos vehículos implicados.

Chuac | Fonte: Xunta de Galicia - Arquivo