O deputado do PP Pablo Prieto renuncia ao escano no Parlamento para presidir a Federación Galega de Fútbol
Por Europa Press / Redacción | SANTIAGO DE COMPOSTELA | 29/01/2025 | Actualizada ás 20:16
O deputado autonómico do PPdeG Pablo Prieto informou de que este mércores renunciou ao seu escano no Parlamento galego para presidir a Real Federación Galega de Fútbol, onde substituirá a Rafael Louzán, actual presidente da Real Federación Española de Fútbol (RFEF).
Ao finalizar o pleno na tarde deste mércores, Prieto tomou a palabra para despedirse polas súas "novas responsabilidades profesionais" na Federación Galega de Fútbol, as cales empezará a exercer desde este xoves, 30 de xaneiro, ocupacións "incompatibles" co seu labor de deputado pola provincia da Coruña.
Así, aproveitou para agradecer ao presidente do PPdeG e a Xunta, Alfonso Rueda, e aos compañeiros do Grupo Popular o seu "respecto e agarimo" durante o seu paso pola Cámara, "unha gran familia". Tamén valorou o "talante en liñas xerais" do resto dos grupos no Parlamento. "Grazas de corazón", despediuse entre aplausos.
O ferrolán presidirá a federación galega tras ser o único candidato presentado. Pablo Prieto, extécnico de clubs coñecidos do fútbol sala galego como o Azkar Lugo ou o O Parrulo de Ferrol, tivo tamén unha carreira no estranxeiro que o levou a dirixir en Emiratos Árabes ou ao combinado nacional de Libia, país que abandonou tras desatarse a revolta que terminou co líder Gadafi.
