A gripe repunta levemente en Galicia, especialmente entre a mocidade
O modelo predictivo de Sanidade cre que os valores poderían descender en próximas semanas, aínda que tampouco descarta que aumenten.
Por Europa Press / Redacción | SANTIAGO | 30/01/2025 | Actualizada ás 15:16
A onda de gripe repuntou levemente a semana pasada en Galicia, no referido tanto ás consultas en atención primaria como nos ingresos hospitalarios, especialmente dos máis novos. Con todo, a tendencia continúa estable e a intensidade, baixa. Así o reflicte o informe da Dirección Xeral de Saúde Pública dado a coñecer este xoves, referido ao período entre o 20 e o 26 de xaneiro. Con estes datos, o modelo predictivo da Consellería de Sanidade cre que en próximas datas os valores da gripe poderían volver diminuír, aínda que pide "cautela" porque, á vista de que seguen crecendo nas franxas de idade máis baixas, non descarta que volva aumentar.
Isto mesmo ocorreu a semana pasada, cando o modelo predictivo asegurou que os datos seguirían descendendo, pero o aumento nos grupos pediátricos xa facía pensar que podería repuntar a incidencia. En calquera caso, entre os días 20 e 20 de xaneiro, a taxa de consultas por gripe en atención primaria incrementouse apenas un 4,4 % con respecto á semana previa e situouse en 66,5 visitas ao médico por cada 100.000 habitantes.
De novo, Sanidade chama á cautela porque esta taxa aumentou entre os máis pequenos de maneira notable: de 98,1 a 125,2 consultas por cada 100.000 entre nenos de 0 a 4 anos; e de 101,1 a 141,5 entre os de 5 e 19 anos. No resto de grupos, continúa en descenso por terceira semana consecutiva. Por áreas sanitarias, só houbo dúas (A Coruña-Cee e Ferrol) onde non subiron as visitas aos médicos por causa da gripe e que se manteñen coas taxas máis baixas. Nas restantes, aumentaron e sitúanse entre as 58,9 consultas por cada 100.000 de Vigo e as 88,4 da de Ourense-Verín-O Barco de Valdeorras.
AUMENTO DE INGRESOS NUN 7,7 %
No que respecta aos ingresos, na cuarta semana do ano houbo 153 pacientes que requiriron de hospitalización, un 7,7 % máis que a anterior. A taxa por cada 100.000 habitantes apenas se incrementou medio punto, ata os 5,7. A taxa de hospitalizados máis alta séguena tendo os maiores de 80 anos, con 22 por cada 100.000 habitantes, aínda que descende máis de tres puntos. No resto de grupos, os ingresos subiron pero mantéñense en niveis baixos: 8,3 ingresos por cada 100.000 persoas de 60 a 79 anos; 5,2 de 0 a 4 anos; e 2,5 de 20 a 59 anos. Por áreas sanitarias, as hospitalizacións creceron moderadamente en catro do sete, ata unha taxa de 4,4 na da Coruña, a 9,8 na de Lugo-A Mariña-Monforte, a 6,8 en Pontevedra-O Salnés e a 3,1 en Vigo.
VENDAS EN FARMACIAS E POSITIVIDADE
En canto ás vendas en oficinas de farmacias, outro dos parámetros empregados para a vixilancia das infeccións respiratorias, dáse a discunstancia de que os antigripais diminuíron un 11,4 % (dispensáronse 875), mentres que o test de antígenos subiron un 4,7 % (retiráronse 519). Así mesmo, a positividade das probas realizadas polo sistema sanitario creceu noutros dous puntos para a gripe A, ata o 14,2 %, en comparación á semana anterior. A positividad para o virus do tipo B foi só do 7,4 %. Entre todas as probas de gripe (sen diferenciar tipo), continuou en aumento ata o 21,3 %. O informe de Saúde Pública tamén recolle datos da incidencia de covid-19 e do virus respiratorio sincitial (VRS) en menores de 2 anos, que se manteñen en niveis moi baixos e con tendencia descendente.
