A CIG urxe protocolos no transporte sanitario ante agresións: "A xente non sabe como ten que actuar"

Representantes da CIG demandaron protocolos no transporte sanitario ante agresións. "A xente non sabe como teñen que actuar", aseverou Ernesto López, técnico de prevención do sindicato na Coruña, xunto a delegados sindicais no sector de ambulancias. Foi nunha comparecencia ante os medios de comunicación que tivo lugar na zona de Urxencias do Hospital Universitario da Coruña para esixir que se lles entregue o protocolo de actuación ante agresións pactado na comisión sectorial.

Ernesto López, sobre as medidas no Chuac, asegurou que existe un protocolo de 2012, "que coñecemos agora e do que só se aproveita a portada", indicou. "Son documentos obsoletos", recalcou. O dirixente sindical, sobre a agresión a un enfermeiro e a un vixiante de seguridade, demandou unha investigación e argumentou que o transporte sanitario que trouxo ao paciente "non sabía o que traía", en relación á súa situación, e que desde a empresa de seguridade e os traballadores do Sergas "non se sabía como actuar".

Por outra banda, incidiu en que no ámbito do transporte sanitario hai un documento pactado na comisión sectorial e publicado no Diario Oficial de Galicia, pero que, engadiu, "non está implementado".

Pola súa banda, Diego Cobos, delegado da CIG na empresa concesionaria do servizo ambulancias na Coruña, afirmou que "o protocolo non está implantado" e que queda "en mans" do persoal as decisións. Ademais, recalcou que non son só agresións físicas, senón tamén psicolóxicas, que, apostilou, son a maioría. "Cúspen e tíranche do pelo", citou como exemplos e para pedir a implicación do Sergas.

TÉCNICOS EN EMERXENCIAS

Tamén os técnicos en emerxencias sanitarias esixiron "mellores protocolos" ante as agresións, tras a sufrida por un enfermeiro e un vixiante de seguridade en Urxencias do complexo hospitalario universitario da Coruña (Chuac). "Os profesionais do servizo de Urxencias e Emerxencias, que ofrece o 061 a través das empresas privadas que xestionan as frotas de recursos sanitarios e que traballan na atención extrahospitalaria, enfróntanse a diario a situacións complicadas".

"Provocadas por pacientes inestables que, en ocasións, non se resolven adecuadamente e terminan no hospital ou centro sanitario, onde xeran un risco maior, como as agresións que sufriron recentemente algúns profesionais do Sergas".