Licitado por máis de 150.000 euros o contrato para o control do acceso á Praia das Catedrais

A Consellería de Medio Ambiente publica este xoves no Diario Oficial de Galicia a licitación do contrato para o servizo de ordenación do uso público e divulgación dos valores naturais do Monumento Natural da Praia das Catedrais, en Ribadeo (Lugo), por un importe de máis de 150.000 euros.

Este contrato, cofinanciado pola Unión Europea, pretende mellorar o uso público do monumento natural durante os períodos de limitación de acceso á praia, co que se inclúe o control e vixilancia das autorizacións, así como as actuacións divulgativas e de atención aos visitantes.

O contrato cubrirá a ordenación do uso público do areal durante os períodos de verán deste ano e de 2018, así como da Semana Santa de 2018 e de 2019.

O grupo de traballo que se formalice deberá, ademais de levar o control dos visitantes que entren á zona, ofrecer información aos visitantes sen a correspondente autorización sobre onde conseguila.

Tamén informarán os turistas sobre a normativa de uso público do monumento, así como da prohibición de ir por fóra dos camiños e sendeiros, recolección de especies de fauna e flora, realizar escalada ou tirar lixo.

Finalmente, este grupo será o responsable de xestionar e controlar as zonas de aparacodoiro, facer seguemento do comportamento dos visitantes e realizar visitas guiadas.

PLAN DE CONTROL DE ACCESO

A Xunta adoptou a decisión de controlar o acceso ao monumento natural das Catedrais para aqueles períodos nos que se rexistra unha maior afluencia, o verán e o período vacacional de Semana Santa, para cando se fixa o límite de acceso en 4.812 persoas.

Os datos do último período indican que un total de 247.770 persoas accederon ao monumento entre os meses de xullo e setembro, un 25% máis que o ano anterior. Por meses, 81.903 foron en xullo, 116.885 en agosto e 48.982 en setembro. En total, completouse o espazo 29 días, tres en xullo e o resto en agosto.