Elnosa ten un mes de prazo para completar a retirada de todo o mercurio almacenado en Lourizán

A Consellería de Medio Ambiente concedeu este luns a autorización ambiental integrada (AAI) a Electroquímica do Noroeste (Elnosa) para poder iniciar o proxecto de reconversión na súa planta de Lourizán, Pontevedra, co fin de poder seguir producindo cloro sen o uso de mercurio.

Desde este luns, a factoría de Lourizán, en cumprimento dunha directiva da Unión Europea, ten que abandonar a elaboración de cloro utilizando mercurio como viña facendo. A empresa iniciará os traballos de desmantelamento dese sistema produtivo e a previsión é que, a partir de mediados de xaneiro, cando se incorpore nova maquinaria, poida elaborar hipoclorito.

Así, a Xunta dá á empresa un prazo máximo dun mes para completar a retirada da totalidade do mercurio almacenado na súa factoría pontevedresa.

Deste xeito figura na resolución de Medio Ambiente na que establece as condicións que terá que cumprir Elnosa para o desmantelamento das súas instalacións vinculadas á produción con mercurio para que o risco ambiental se vexa minimizado "de forma case inmediata". Ademais, establécense as condicións que a empresa terá en conta para a rehabilitación de lugar no que está a planta, incluídos o chan da instalación.

Precisamente, o pasado sábado máis de 300 persoas participaron nunha cadea humana convocada pola Asociación pola Defensa da Ría (APDR) de Pontevedra para esixir que non se concedese esta autorización ambiental, xa que a consideran unha prórroga oculta a unha concesión marítimo-terrestre que finaliza o 29 de xullo de 2018.

CRONOGRAMA

Segundo informa a Xunta, no cronograma presentado pola empresa o proceso de desmantelamento da tecnoloxía actual prolongaríase durante un ano.

Con todo, no mantemento da produción industrial en Lourizán contémplase unha primeira fase na que só se fabricará hipoclorito sódico a partir de cloro adquirido a terceiros. Posteriormente, e unha vez reconvertida a instalación á nova tecnoloxía esixida pola UE para este sector (denominada de membrana, que substitúe ao mercurio), a factoría podería retomar a produción de cloro e derivados na planta de Pontevedra.

Así mesmo, o Goberno galego subliña que esta autorización ambiental chega con independencia das licenzas, autorizacións e concesións que legalmente sexan preceptivas para o mantemento da actividade en Lourizán, tal e como establece a normativa en materia de prevención de contaminación.

ERE

Pola súa banda, o grupo portugués CUF, propietario da electroquímica, presentou o pasado xoves aos traballadores de Elnosa unha proposta de Expediente de Regulación de Emprego (ERE) extintivo con 16 despedimentos.

A dirección de Elnosa trasladou toda a documentación sobre o ERE, pero non entrou en detalles sobre os departamentos en que se producirían eses despedimentos previstos nin sobre as indemnizacións que cobrarían estes traballadores.

O presidente do comité de empresa, Avelino García, indicou que ao longo da negociación e despois de estudar a documentación entregada tentarán reducir a 10 o número de despedimentos e obter as mellores condicións para os afectados.