Ángel Mato gobernará en solitario, pero coa colaboración de Ferrol en Común

O PSOE gobernará en solitario o Concello de Ferrol. Finalmente, non haberá un goberno de coalición na cidade, senón que Ángel Mato gobernará cos concelleiros do PSOE, tras non chegar a un pacto de goberno con Ferrol en Común e o BNG.

Mato e Suárez realizaron unha comparecencia conxunta para dar a coñecer un acordo de dez puntos para desenvolver nesta lexislatura, como na mellora das infraestruturas, erradicación da pobreza, fomento do emprego, políticas de igualdade, a candidatura a Patrimonio da Humanidade e o Camiño Inglés ou a aprobación dun novo Plan Xeral de Ordenación Municipal, entre outras.

O alcalde manifestou que este acordo puxo de manifesto "aquelas cousas que nos unen", o que posibilitou que "a esquerda gobernará Ferrol e moitas cousas sairán adiante".

Ao mesmo tempo recoñeceu que este non é o mellor inicio "pero si é un bo inicio", como tamén facía referencia ao sucedido na anterior lexislatura, cando rompía o pacto de goberno entre Ferrol en Común e un PSOE liderado a nivel municipal naquel momento pola súa secretaria xeral, Beatriz Sestayo.

Sobre as negociacións que se mantiveron nestes últimos días, o rexedor afirmou que "se levaron con discreción", onde trataron proxectos "que están en marcha" e que desde o novo goberno quixeron que teñan continuidade, porque desde o PSOE e Ferol en Común lles corresponde "facer política", afirmou Mato.

"NON ERA BO"

Pola súa banda, o portavoz municipal de Ferrol en Común, Jorge Suárez, considerou fundamental que non exista "inestabilidade" no concello, polo que quixo pór en valor os acordos subscritos co PSOE.

"Para resaltar todo o que nos une e non o que nos separa", sinalou, recoñecendo que debido ás diferenzas entre ambas as formacións un goberno de coalición "non era bo para a cidade".

Así, asegurou que Ferrol en Común actuará en conciencia coas súas ideas e programa "como tamén fará o PSOE", polo que lles desexou "toda a sorte do mundo" nas súas responsabilidades de goberno, e prometeu "compromiso de traballo", onde as discrepancias entre ambas as formacións "se poden manifestar mellor desde a oposición e non desde o goberno".

No aspecto das diferenzas que imposibilitaron un goberno de coalición, ambos os líderes quixeron remitirse ao comentado durante a pasada campaña electoral, onde se puxeron de manifesto aquelas cousas onde presentan "concepcións diferentes", afirmou Mato. Palabras que subscribiu Suárez, que quixo deixar claro que Ferrol en Común "non quería entrar no goberno a calquera prezo".

En relación á imposibilidade de chegar a un acordo de goberno co BNG, o alcalde recoñeceu que "había máis discrepancias" e que o seu labor como alcalde é "promover o diálogo con todas as formacións políticas" e en política "ten que haber un achegamento entre diversas posturas."

Nos próximos días o alcalde confirmou que dará a coñecer a repartición de áreas de goberno entre os concelleiros socialistas, ademais da organización municipal das comisións e institucións nas que ten representación o Concello de Ferrol, nun pleno extraordinario que está previsto convocar para a próxima semana.

BNG

Uns minutos despois desta comparecencia, o portavoz municipal do BNG, Iván Rivas, argumentou o seu rexeitamento ao goberno de coalición porque "entrar nun goberno do PSOE era complexo", onde quixo lembrar que as decisións e estratexias dos socialistas sobre o naval cando gobernaron "non foron boas para a cidade".

A pesar disto, Iván Rivas afirmou que "debido ao estado de deterioración da cidade" desde a formación nacionalista estaban dispostos a realizar un esforzo, pero co PSOE "a dependencia do Estado é evidente e iso está na orde do día", manifestou.

O convenio co Ministerio de Defensa foi un dos puntos de desencontro entre ambas as formacións, onde Iván Rivas puxo como exemplo uno dos seus puntos como é o campo de tiro de Catabois "no que hai un informe de Facenda que di que este campo xa é de carácter municipal".

Outro dos puntos no que non hai acordo é no da municipalización de servizos básicos de Ferrol "cuns contratos que están caducados e sería posible subrogar ao persoal", afirmou Iván Rivas.

Nas negociacións co PSOE, Iván Rivas recoñeceu que desde o BNG estaban dispostos a renunciar a tres das súas peticións, sen especificar cales, como tamén facía un símil deportivo, porque desde as filas socialistas "queríannos meter un cinco a cero.

Iván Rivas tamén afirmou que atopara moitas similitudes no programa electoral do PSOE co do PP, polo que o BNG "tiña máis difícil poder formar parte deste goberno".

Ao mesmo tempo, as próximas semanas serán de reflexión interna no BNG, segundo recoñeceu Iván Rivas, o cal asumía a responsabilidade polos resultados obtidos nas eleccións municipais, dado que coa situación actual non tiñan "capacidade para condicionar un goberno".

Por iso, avanzou que convocará á asemblea local para tratar o futuro da formación da cidade e da súa postura nos plenos municipais, porque agora "as votacións van ser máis claras", debido a que a suma entre PSOE, Ferrol en Común e BNG posibilitaría que as medidas saísen adiante.