Bescansa busca apoios entre os "decepcionados" de PSOE e Unidas Podemos

A cabeza de lista de Más País pola Coruña ao Congreso, Carolina Bescansa, pediu aos decepcionados cos que non lograron formar Goberno tras os resultados dos comicios de abril que lles dean "a maior forza" electoral posible para conformar un executivo "de progreso".

En declaracións aos medios nun acto no Panteón dos Galegos Ilustres en Santiago, Bescansa lembrou que se atopan "nunha semana decisiva", posto que "máis dun 30 ou 40 por cento da xente" define o seu voto durante a campaña electoral.

Así, mostrou a Más País como "única garantía" para lograr "un goberno de progreso" e "non un bloqueo" político, e advertiu do "enorme cansazo" da xente coa clase política, posto que "estas eleccións non se tiñan que producir".

Por iso, esperan "responsabilidade" para que "finalmente triunfe" esa maioría progresista para lograr formar un Goberno, insistindo en que a cidadanía é "moi crítica co que fixeron" os que tiñan a responsabilidade de formar ese Executivo.

Bescansa tamén sinalou que se necesitará unha "posición forte" para impulsar accións como a derrogación da reforma laboral e que están "moi lonxe de falar de fracaso", dado que "o fracaso" foi o "dos que non foron capaces" de construír un Goberno.

A pesar diso, matizou que Más País non compite con outros representantes "decididos a construír" unha alternativa de cambio, senón "coa decepción" e os que están "a pensar en quedar en casa" o próximo 10 de novembro.

Carolina Bescansa xunto a Íñigo Errejón | Fonte: MÁIS PAÍS