Coñece cales son as ameazas á informacion e á liberdade de expresión e como combatelas
O Colexio de Xornalistas xunta este xoves en Santiago a destacados especialistas e medios, entre eles, Galicia Confidencial, para falar do fenómeno das fakenews e da desinformación.
Por Galicia Confidencial | Compostela | 25/11/2019 | Actualizada ás 20:45
A aparición de diferentes fenómenos que aumentan o peso da desinformación no panorama mediático, especialmente, a proliferación de bulos e noticias falsas está tendo un forte impacto na sociedade e na política. Non é un fenómeno novo, pero hai pouca información sobre a súa expansión e como combatelo.
Precisamente, e para analizar esta problemática, o Colexio Profesional de Xornalistas de Galicia organiza a xornada Desinformación e ameazas á liberdade de expresión: Retos do xornalismo ante a irrupción dos extremismos. Unha xornada que terá lugar o vindeiro xoves 28 de novembro no auditorio da Facultade de Ciencias da Comunicación da USC.
O evento reunirá a xornalistas como Paolo Berizzi, Marta Peirano ou Edith Rodríguez, especializados en extremismos, desinformación e ataques á liberdade de expresión, que ofrecerán cadansúa conferencia. Ademais terán lugar tres mesas redondas con xornalistas, responsables de verificación e fact-checking e representantes do ámbito académico.
Paolo Berizzi falará sobre “O avance da extrema dereita en Europa: Desafío para o xornalismo”. Berizzi destaca como investigador do neofascismo no seu país desde as páxinas do diario La Repubblica e de libros como NazItalia. A xornada de mañá completarase con dúas mesas redondas; “As fake news como estratexia informativa”, coa participación de Marilín Gonzalo (de Newtral.es), Patricia R. Blanco (do blog ‘Hechos’ de El País), Eli Vivas (da plataforma Verificat e Storydata) e César Peña (do Laboratorio de Innovación Audiovisual de RTVE).
COMO AFRONTAR ESTES FENÓMENOS DESDE O XORNALISMO
Na segunda, os xornalistas Fernando Varela (infoLibre), Virginia P. Alonso (Público), María Obelleiro (Sermos Galiza e Nós Diario), Xosé Hermida (El País), Xurxo Salgado (Galicia Confidencial) e David Lombao (Praza Pública) debaterán sobre "Os novos movementos extremistas e como afrontar o fenómeno desde o xornalismo".
Ás catro da tarde reanudarase a actividade cunha conferencia de Marta Peirano, “Facer xornalismo na era da desinformación”. Xornalista e ensaísta, especializada en tecnoloxía e poder, Peirano foi xefa da sección cultural de eldiario.es e fundadora de CryptoParty Berlín e Copyfight.
A continuación, a mesa redonda "Ameazas para a información no mundo dixital", xuntará aos expertos das universidades Alexandre López-Borrull (Universitat Oberta de Catalunya), Raúl Magallón Rosa (Universidad Carlos III), Dolors Palau-Sampio (Universitat de València) e Edita de Lorenzo (Universidade de Vigo, COETG).
A xornada rematará con Edith Rodríguez, relatora para os ataques contra a liberdade de prensa de Reporteiros Sen Fronteiras España, que impartirá a conferencia "Os ataques á liberdade de prensa en España".
A inscrición nas xornadas é gratuíta até completar o aforo do auditorio e pode realizarse a través do formulario dispoñible na rede. Ás persoas asistentes entregaráselles un diploma acreditativo. Para máis información pode consultarse co Colexio de Xornalistas no correo electrónico xornalistas@xornalistas.gal, no teléfono 981 93 56 70, ou na súa sede na Rúa Ponferrada, 9, baixo, de Santiago de Compostela.
