Os concellos tentan reducir os efectos do confinamento dos seus veciños con actividades ou a atención psicolóxica

Os concellos de diversas localidades galegas están a mostrar o seu apoio a toda a veciñanza a través de iniciativas de distinta natureza como a organización de actividades telemáticas, a prórroga de impostos municipais, servizos de atención psicolóxica ou a distribución de Equipos de Protección Individual (EPI).

Case dúas semanas despois de que entrase en vigor o estado de alarma en todo o país, os gobernos locais puxeron en marcha diferentes ideas para mitigar os efectos sociais, persoais e económicos que esta crise sanitaria suporá para a cidadanía.

O Concello da Coruña, por exemplo, decidiu impulsar o Programa de Actividades Socioculturais da Rede de Centros Cívicos, a través dunha canle de Youtube (https://www.youtube.com/channel/ucdb6atcllvxhclzm43z-krg) no que os profesores colgan tutoriales gravados de pilates, debuxo, baile, novas tecnoloxías, bordado ou estimulación cognitiva. Esta iniciativa está destinada a toda a cidadanía, pero sobre todo a aquelas persoas que están a pasar estas semanas soas.

Outros concellos, como o de Ponteareas aprobaron esta semana prórrogas para o pago de impostos municipais. Aínda que a Deputación de Pontevedra xa aprazara o pago de impostos da taxa do lixo, imposto sobre os vehículos, a venda ambulante ou as dos postos de mercados municipais, agora Ponteareas prorrogou os de ocupacións de terrazas, servizo de escolas infantís, escola de música ou do conservatorio.

Este non foi o único goberno local que implantou esta medida, senón que cada vez súmanse máis. Por exemplo, o de Lugo decidiu aprazar o cobro do IBI, a exoneración do pago de alugueres municipais a empresarios ou a suspensión do cobro das terrazas entre outras medidas.

SERVIZO DE ATENCIÓN PSICOLÓXICA

Para asistir a aquelas persoas a nivel psicolóxico, o Concello de Pontevedra decidiu implantar un servizo de atención con expertos (un psicólogo, unha traballadora social e unha educadora social) para atender as necesidades das persoas todos os días de 10,00 a 14,00 horas no número: 678 75 49 33.

A idea é que estes profesionais, da Fundación Meniños, estean a disposición cidadá para que "as familias poidan atravesar dificultades neste período de confinamento" dunha forma máis óptima. Eles son os mesmos que se prestan para atender a persoas maiores e tamén para resolver diferentes conflitos froito da convivencia con adolescentes, problemas nas relacións de parella e o incremento da sensación de illamento das persoas que viven soas.

DISTRIBUCIÓN DE EPIS

O Concello de Ferrol, pola súa banda, dedicouse a distribuír 17.525 EPIS desde o pasado martes. As primeiras unidades foron destinadas ao Complexo Hospitalario Universitario de Ferrol, ao Centro de Atención a Persoas con Discapacidade Física e ao albergue Pardo de Atín.

A partir do mércores houbo suficientes unidades a disposición para comezar a repartición en residencias de maiores, entidades benéficas, persoal de atención no fogar e corpos de seguridade, explicou a administración local nun comunicado. Igualmente, a distribución de EPIs chegou a outros concellos como Fene, Cedeira e Pontedeume, que lle trasladaron ao alcalde, Ángel Mato, "necesidades urxentes".

COSTUREIRAS

Un exército de costureiras voluntarias, unidas a distintas firmas galegas de moda, reorientaron a inactividade do estado de alarma cara á confección de miles de máscaras de tea que doaron a concellos, asociacións e particulares da comunidade que desexen ter algún tipo de protección extra á hora de saír á rúa ou acudir a traballar neste período.

A iniciativa, nacida por todo o territorio nacional xunto coa epidemia de coronavirus, dispersouse pronto por Galicia, a iniciativa, sobre todo, de páxinas en redes sociais de firmas galegas de roupa que, ademais de producir as súas máscaras de tea, difundiron patróns para que calquera, con material e unha máquina de coser en casa, puidese reproducilas.

DEPUTACIÓNS

A Deputación de Pontevedra púxose "a disposición" da Xunta de Galicia para colaborar na repartición de material santiario (máscaras, luvas e traxes) aos concellos da provincia.

Nun comunicado emitido este sábado, xornada na que o número dous do Goberno autonómico, Alfonso Rueda, pediu ás deputacións que prestasen colaboración, a administración pontevedresa que dirixe Carmela Silva (PSOE) expresou a súa disposición a axudar para lograr "unha repartición máis eficaz, obxectivo e equitativo".

Tamén as deputacións de Lugo e A Coruña confirmaron que colaborarán coa Xunta na repartición de material sanitario aos concellos, segundo informaron as insticiones gobernadas polos socialistas José Tomé (Lugo) e Valentín González Formoso (A Coruña) en senllos comunicados.

Así, súmanse ás de Pontevedra e Ourense, que xa se puxeron a disposición da Xunta para axudar na repartición das máscaras, traxes e luvas que a Administración autonómica distribuirá entre as administracións locais para evitar contagios entre os seus traballadores.

Este sábado, o número dous do Goberno galego, Alfonso Rueda, apelaba á colaboración das deputacións para colaborar na repartición e afirmaba que a de Ourense (a única goberanda polo PP, partido que rexe a Xunta) xa comunicara a súa disposición a facelo.