O BNG insiste a Feijóo en que non hai garantías de normalidade para unha campaña electoral en xullo

A portavoz nacional do BNG, Ana Pontón, advertiu de que o feito de contemplar que a convocatoria electoral no mes de xullo poida ter que suspenderse, de novo, "corrobora o erro" de chamar ás urnas de forma inmediata. Ademais, insistiu en que a campaña non poderá desenvolverse con "garantías" de normalidade para facer achegar as alternativas aos cidadáns e apelou a que reflexione sobre estas cuestións por última vez antes de asinar un decreto.

No entanto, expresou a súa sensación de que haberá unha "convocatoria inminente" das eleccións, tras a reunión co presidente da Xunta, Alberto Núñez Feijóo, e aínda que considera "arriscado" dicir unha data, decántase por que o mandatario apostará polo 12 de xullo, coincidindo cos comicios no País Vasco. "Seguimos insistindo en que é irresponsable, non é moi prudente que se convoquen eleccións, gustaríanos que o presidente o pensase polo ben da saúde dos galegos", expresou.

Pontón insistiu no seu rexeitamento a convocar eleccións "en pleno estado de alarma e en plena pandemia". "É irresponsable, non é prudente", considerou, aínda que recoñeceu que viu que o presidente da Xunta ten a "decisión tomada" e que a reunión deste xoves cos grupos políticos foi "puro formalismo".

Pontón apuntou que, "seguramente, o 12 ou o 19 de xullo" os galegos estarán convocados ás urnas. "É unha irresponsabilidade, porque o que necesita agora este país é facerlle fronte á pandemia, que está a atravesar unha crise económica e necesitaría da unidade de todos para facer fronte á situación, pero vemos que as prioridades de Feijóo son outras", apuntou.

Neste sentido, advertiu ao dirixente galego de que "se pensa que pode sacar rédito electoral dunha pandemia, equivócase" e augurou que iso o "van a demostrar" os galegos.

"CORROBORA O GRAN ERRO"

Preguntada por en que condicións se teñen que celebrar as eleccións e da posibilidade de que haxa que volver cancelalas, contestou que "o feito de que se estea falando de que esta convocatoria teña que suspenderse, o único que corrobora é que é un gran erro facer que os galegos vaian neste momento ás urnas". Por tanto, reafirmouse en que "non é lóxico" que se faga unha convocatoria na que se "prevé" a súa suspensión.

"O que pon enriba da mesa é a irresponsabilidade, a falta dun criterio claro e rotundo que avale que neste momento hai seguridade democrática e sanitaria para facer unhas eleccións, e resúltanos difícil calibrar como se pode facer unha campaña nestas circunstancias", reflexionou Ana Pontón, quen lembrou o antecedente de Francia en que se celebraron eleccións cunha "baixísima participación".

Ademais, Pontón puxo o acento en que tampouco se coñecen as condicións epidemiolóxicas nas que se pode chegar á campaña electoral e que tipo de actividades se van poder facer, o pon o "foco" en que "tampouco se dan as garantías democráticas de participación de todo o mundo, tanto na campaña como no propio proceso electoral".

"QUE NON TEÑA PRÉSA"

"Pediríalle a Feijóo que non teña présa en convocar as eleccións e centre as súas enerxías en loitar contra o coronavirus, tanto no aspecto sanitario, como no económico, que debería de ser o que teña na cabeza", insistiu a tamén deputada nacionalista, quen lamentou que sexa "o único galego" que está "a pensar" en eleccións.

Para Pontón, "está claro que nunha pandemia non se dan as condicións democráticas para un proceso electoral con garantías", polo que "vai dificultar" que nesta campaña se poida facer chegar propostas nun "debate sereno".

Dito isto, Pontón insistiu en que se trata dun "acto de irresponsabilidade, e mesmo de soberbia, querer levar aos galegos ás urnas" neste momento, en que, engadiu, urxen solucións para as persoas sen emprego, autónomas e para unha sociedade que está en "shock social".

CAMPAÑA "EN POSITIVO"

A dirixente nacionalista defendeu que, en todo caso, o Bloque levará a cabo "unha campaña intensa para explicar as propostas alternativas" desta formación para "levantar este país". "Acabamos de ver como a crise da covid deixa consecuencias sanitarias, pero tamén desde o punto de vista social e económico. O país caeu e necesitamos collelo da man e levantalo", manifestou.

Deste xeito, Pontón indicou que o BNG fará "unha campaña en positivo, para mostrar que hai alternativas ante a crise e que podemos pór en marcha un modelo de país novo, que se fai máis necesario que nunca". "Temos propostas claras para a reconstrución económica e social de Galicia", aseverou.