As exportacións galegas caen un 24,5% polos efectos da COVID-19

Segundo os datos publicados este luns pola Dirección Territorial de Comercio e ICEX en Galicia, entre xaneiro e maio deste ano, Galicia exportou bens por un valor de 6.697,0 millóns de euros, o que supón un descenso interanual do 24,5%, e importou por un valor de 6.207,5 millóns de euros, que implica un descenso interanual do 17,2%.

Así, segundo os valores indicados, o saldo comercial de Galicia co estranxeiro contabilizou un superávit de 489,5 millóns de euros no período analizado (inferior nun 15,1% ao superávit rexistrado un ano antes, en xaneiro-maio de 2019).

Comparativamente co conxunto estatal, o retroceso indicado da exportación galega é máis acusado que o descenso, do 15,2%, rexistrado pola exportación española, o mesmo que no fluxo da importación. Por tanto, Galicia perde peso dentro do comercio exterior de España (que pasa a ser do 6,6% en exportación e do 5,6% en importación).

Por provincias, hai que destacar que a evolución negativa indicada da exportación de Galicia responde en maior medida, en termos absolutos e relativos, aos decrecimientos principalmente da Coruña e, en menor medida, de Pontevedra (con taxas decrecientes respectivas en termos relativos do 33,3% e 15,6%); aínda que, en termos relativos, Ourense tamén "acusou un fortísimo retroceso exportador" (do 27,9%) no período analizado, mentres que a exportación de Lugo caeu en menor medida (con taxa decreciente do 12,3%).

Polo que respecta ao descenso da importación galega, a incidencia da Coruña e Pontevedra tamén foron determinantes en termos absolutos. En termos relativos, igualmente A Coruña rexistrou a maior caída (con taxa decreciente interanual do 29,0%), seguida de Ourense e Pontevedra (con taxas decrecientes o 26,1% e 23,3%, respectivamente); en tanto que o retroceso da importación de Lugo non foi tan acusado (con taxa decreciente do 12,4%).