Compostela Aberta e Ferrol en Común piden que o Congreso investigue "a fuxida do rei hemérito"
Con estas propostas, as formacións súmanse ao grupo municipal de Marea Atlántica, que presentou a semana pasada unha moción para debater no pleno do Concello da Coruña no mesmo sentido.
Por Europa Press / Redacción | SANTIAGO DE COMPOSTELA | 12/08/2020 | Actualizada ás 18:40
Os grupos municipais de Compostela Aberta e Ferrol en Común rexistraron senllas mocións para condenar "a fuxida do rei emérito" e pedir que se lle retiren títulos honoríficos e que o Goberno do Estado e o Congreso abran unha investigación parlamentaria sobre as súas actividades.
En concreto, Compostela Aberta considerou que os acontecementos que se están producindo ao redor da Casa Real "parecen indicar que a corrupción na institución non responde a casos illados" e que é "unha seria ameaza" para a calidade democrática e o Estado de dereito.
A portavoz da formación, Marta Lois, considerou que é necesario abrir unha investigación parlamentaria sobre a figura de Juan Carlos I e "os delitos que puido cometer desde o ano 2014, cando lle foi retirada a súa condición de inviolabilidade xurídica". A moción, que se debaterá en setembro, tamén reclama que, de demostrarse os delitos, devolva o diñeiro ás arcas públicas.
Pide tamén que todas as administracións retiren as honras e títulos honoríficos de Juan Carlos de Borbón e que se celebre un referendo sobre a monarquía.
Na mesma liña, Ferrol en Común explicou que ampliou unha moción rexistrada o pasado 27 de xullo para solicitar a condena á "fuga" de Juan Carlos I e reclamar tamén unha votación dos cidadáns sobre a monarquía.
O texto orixinal da moción demandaba retirar o busto do rei emérito da fachada do Concello e quitarlle os títulos honoríficos e recoñecementos, como a medalla de ouro que lle concedeu a corporación. Neste caso, a iniciativa debaterase este xoves na continuación do pleno ordinario de xullo.
Ferrol en Común considerou que Juan Carlos I "non é exemplo para ninguén e, por tanto, non debe gozar de títulos, honras nin privilexios".
Con estas propostas, as formacións súmanse ao grupo municipal de Marea Atlántica, que presentou a semana pasada unha moción para debater no pleno do Concello da Coruña no mesmo sentido.
