A Gala do Libro Galego muda de nome en homenaxe a Rosalía: Premios Follas Novas
A entrega volverá ser 'en liña' en maio, aínda que se estudará facela presencial "en caso de melloría manifesta" da pandemia.
Por Europa Press / Redacción | Santiago de Compostela | 30/01/2021 | Actualizada ás 18:57
A Gala do Libro Galego iniciou esta semana a selección de obras finalistas para a súa sexta edición, coa que pasará a denominarse Premios Follas Novas do Libro Galego en homenaxe á obra de Rosalía de Castro publicada en 1880.
Así, as tres asociacións convocantes deste galardón --Asociación de Escritoras e Escritores en Lingua Galega (AELG), a Asociación Galega de Editoras (AGE) e a Federación de Librarías de Galicia (FLG)-- arrincaron xa o proceso para escoller os títulos e iniciativas que optarán a cada unha das 15 categorías.
En concreto, os Premios Follas Novas do Libro Galego recoñecerán unha obra de ensaio e investigación; unha de divulgación; unha de narrativa; unha obra infantil; unha xuvenil; un libro ilustrado; un libro de banda deseñada; unha iniciativa bibliográfica; unha obra traducida; un libro de poesía; un de teatro; a mellor edición; unha iniciativa cultural ou en fomento da lectura; un proxecto literario na rede; e un premio á traxectoria en xornalismo cultural.
Estas categorías completaranse coa entrega durante a propia gala --que será exclusivamente 'en liña'-- de tres premios honoríficos á edición, a unha libraría e a un escritor galego universal.
Este evento, convocado coa colaboración do Concello de Santiago, a Deputación da Coruña, a Xunta e a asociación de autores e editores CEDRO, volverá estar marcado pola pandemia da covid-19, polo que todos os procesos de elección da sexta edición serán virtuais.
Isto tamén inclúe á propia gala, que "só en caso de melloría manifesta" da situación epidemiolóxica de Galicia poderase celebrar de forma presencial, segundo explica a organización. De feito, a V Gala do Libro tívose que atrasar medio ano --de maio a novembro-- e derivouse ao formato 'en liña' debido á crise sanitaria.
A VI edición, rebautizada como os Premios Follas Novas do Libro Galego, terá como protagonistas a autores, títulos e iniciativas desenvolvidas durante o ano 2020, que foi "especialmente difícil para todo o sector", recalca a organización.
