Primeiro gran lume da primavera no parque natural do Xurés

O incendio forestal rexistrado este xoves no municipio ourensán de Muíños, e que afectou ao parque do Xurés, xa foi extinguido, e a superficie queimada é inferior a unha hectárea, segundo informou a Consellería do Medio Rural.

O incendio, procedente de Portugal, entrou en Galicia sobre as 13,20 horas deste xoves, deuse por estabilizado pouco despois das 16,00 horas, e por controlado unha hora despois. Finalmente declarouse extinguido ao redor das 17.45 horas.

O lume afectou á parroquia de Requiás e, para a súa estabilización e control, mobilizáronse un técnico, dous axentes, 5 brigadas, 3 motobombas, 2 helicópteros e 2 avións (medios acumulados).


A consellería do Medio Rural lembrou que os cidadáns teñen á súa disposición o número de teléfono gratuíto 085, para chamar no caso de que detecten algún incendio forestal. Tamén hai un teléfono anónimo e gratuíto, o 900 815 085, para denunciar calquera actividade delituosa incendiaria da que se teña sospeita ou coñecemento.

Incendio no Xurés | Fonte: EP