Ferrol contará este ano co primeiro gran parque canino urbano de Galicia
Por E.P. | SANTIAGO DE COMPOSTELA | 12/04/2025 | Actualizada ás 16:24
A conselleira de Medio Ambiente e Cambio Climático, Ángeles Vázquez, e o alcalde de Ferrol, José Manuel Rey, asinaron este sábado o protocolo de colaboración para realizar o primeiro gran parque canino urbano de Galicia.
Esta infraestrutura, que estará situada no polígono de Catabois e contará cunha superficie aproximada de 2.000 metros cadrados, contará cun investimento de 70.000 euros coa previsión de que poida estar operativa antes de que finalice este ano. O acordo terá vixencia ata o 31 de decembro de 2025 e o documento establece que a Xunta colaborará coa redacción do proxecto e a posterior construción do espazo.
Pola súa banda, o goberno local porá a disposición os terreos, facilitará os correspondentes permisos municipais e, cando estea executado, farase cargo do mantemento e explotación do parque. O recinto terá áreas de xogo, fontes de auga, obstáculos e ramplas para que poidan exercitarse, así como bancos para os propietarios.
