O BNG insistirá na rebaixa "inmediata" da AP-9 cunha nova caravana de vehículos
Está convocada para este domingo.
- Pontón sinala que a rebaixa de peaxes saída da reunión entre Feijóo e Ábalos foi "conseguida polo BNG"
- Unha caravana convocada polo BNG para reclamar o fin da "estafa" da AP-9
Por E.P. | SANTIAGO DE COMPOSTELA | 12/03/2021 | Actualizada ás 12:52
O BNG chama a mobilización cidadá con outra caravana de coches, que terá lugar este domingo en Santiago de Compostela, para reclamar ao Goberno estatal a rebaixa inmediata das peaxes da AP-9.
Nunha rolda de prensa ofrecida este venres, 11 de marzo, desde a sede da formación na capital galega, o deputado do Bloque no Congreso, Néstor Rego, anunciou esta segunda acción reivindicativa que se producirá 15 días despois da primeira, celebrada na Coruña.
O BNG celebra que o ministro de Transportes, Mobilidade e Axenda Urbana, José Luís Ábalos, confirmase esta semana no Congreso "o compromiso" do Goberno a "dar cumprimento do acordo" de investidura, que contempla o abaratamento da AP-9.
Con todo, os nacionalistas entenden "que houbo tempo máis que suficiente para o proceso de negociación con Audasa", así como para tramitar o decreto que permita esta rebaixa. E é que os Orzamentos Xerais do Estado (PGE) para 2021 conteñen unha partida de máis de 50 millóns de euros para que este abaratamento sexa unha realidade.
"Reiteramos a esixencia de que se faga de maneira inmediata", sentenciou Rego, para xustificar a caravana de coches que marchará por Santiago o domingo.
