O sindicato CC.OO acusa o Goberno de tratar a Navantia como "un chiringuito privado"
Traslada o seu "máis profunda decepción e indignación" coa xestión da empresa pública.
Por Europa Press / Redacción | Ferrol | 02/04/2021 | Actualizada ás 13:38
A sección sindical de CC.OO en Navantia Ferrol acusou ao Goberno de tratar a Navantia como un "chiringuito privado" ao colocar a políticos "con salarios desorbitados" e que "nada coñecen" da xestión da empresa.
Así o sinala nun comunicado remitido aos medios, no que traslada o seu "máis profunda decepción e indignación" coa xestión da empresa pública por parte do Executivo estatal.
O sindicato considera que o anuncio do cambio do actual presidente, "o terceiro en menos de tres anos", é "síntoma" de que o actual goberno "non ten intención de abordar os problemas" que asfixian a Navatia.
"As persoas que traballamos en Navantia fixemos un gran esforzo por negociar un plan industrial no ano 2018 que garantise o futuro da nosa empresa e das nosas comarcas pero, sen un cambio de rumbo como o que se expuña naquel momento, non tardaremos en volver á situación catastrófica", sinala CC.OO.
O sindicato lembra que leva tempo denunciando a "deterioración" nos procesos produtivos, das relacións laborais, así como a "calamitosa situación económica" dunha empresa que xera máis de 38.000 postos de traballo no conxunto do Estado.
"Lonxe de acometer estes problemas, o actual goberno está a utilizar á nosa empresa como o seu chiringuito privado, colocando políticos e políticas con salarios desorbitados, que nada coñecen de como se xestiona unha empresa como a nosa e o único que fan é reafirmar ás actuais direccións corporativas, que son o auténtico cancro de Navantia", subliña.
Ademais, o sindicato crítica que se pasase do deseño e fabricación dos produtos a "multiplicar por tres ou por catro" a subcontratación á vez que o persoal principal se reduce a "menos da metade".
