A Xunta prevé comezar a negociar co Goberno a lei de saúde a principios de semana
O goberno galego busca "convencer" o Executivo central "de que a lei non é inconstutional". Repróbanlle que non se iniciasen as conversas antes de interpor o recurso
Por E.P. | SANTIAGO DE COMPOSTELA | 17/04/2021 | Actualizada ás 16:25
A Xunta prevé que durante "os primeiros días" desta semana comece a negociación no marco da Comisión Bilateral para tratar de liquidar as diferenzas ao redor da reforma galega da lei de saúde, ante o recurso de inconstitucionalidade impulsado polo Executivo que dirixe o socialista Pedro Sánchez.
Así o detallou o vicepresidente primeiro da Xunta, Alfonso Rueda, preguntado polos medios nun acto en Bande (Ourense), onde remarcou que o Goberno galego quere "falar" e "canto antes" para "chegar a un acordo". "Se pode ser o luns, mellor que o martes", afirmou Rueda, que apuntou que "parece que nos primeiros días da semana empezarán esas conversacións".
Deste xeito, sinalou que o Executivo galego busca "convencer ao Goberno de que a lei non é inconstitucional". Así, remarcou que a súa reforma levouse a cabo "despois de pedir durante meses unha lei para xestionar a pandemia que servise para todo o territorio nacional" e observar que "non se fixo nada" respecto diso.
Neste sentido, volveu subliñar que o ditame do Consello de Estado "non di que (a reforma da normativa) sexa inconstitucional", senón que "antes da lei galega o Estado debía lexislar". Así, confiou en trasladar esta situación ao Goberno mediante a Comisión Bilateral co obxectivo de pedirlle que "canto antes se poñan a traballar nisto" para poder "ter unha seguridade xurídica".
En todo caso, Alfonso Rueda considerou que "o normal sería que antes de interpor o recurso se puxeran en contacto coa Xunta" para "empezar as conversacións e tentar chegar a un acordo" e explicou que así llo trasladou esta semana ao ministro de Política Territorial, Miquel Iceta, nunha conversación telefónica.
"Primeiro interpuxeron o recurso e agora están de acordo en falar", reprobou o vicepresidente do Goberno galego, que remarcou que esta administración insiste en demandar que "se retire o recurso" se se busca "falar en serio". "Sería a mellor mostra de vontade e, se ese recurso vai acompañado da petición de suspensión dos artigos que impugnan, enténdese menos aínda. Non falan connosco nin para interpor o recurso nin para pedir a suspensión. O lóxico sería que iso se levantase e ao mesmo tempo falar", resolveu.
PROPOSTA DE RECURSO E DITAME
A idea inicial do Goberno central, tal e como expresou na petición de informe ante o Consello de Estado, era recorrer tres aspectos: as medidas preventivas (é dicir, as cuestións a regular), a adopción das medidas preventivas ('o modus operandi' para executar as medidas) e o réxime de sancións (en varios artigos e, especialmente, no referido a as multas por incumprimentos das medidas que o Goberno central cuestiona).
No seu informe, o Consello de Estado considera que é pertinente interpor recurso de inconstitucionalidade a un dos apartados concretos, o relativo ás medidas. Literalmente, sinala: cabe este recurso ao apartado cinco do artigo único da Lei da Comunidade Autónoma de Galicia 8/2021, de 25 de febreiro, no relativo ao apartado 2 do artigo 38 que introduce na Lei 8/2008, de 10 de xullo, de Saúde de Galicia.
O apartado cinco introduce un artigo 38 á lei de saúde galega con dous apartados, dos cales o Consello de Estado avala que se recorra a segunda parte, como se mencionou. Esta 'segunda parte' fala de medidas preventivas de recoñecemento, tratamento, hospitalización ou control cando haxa un perigo para a saúde da poboación.
E para iso, ademais doutras medidas xerais, establece que se poderán adoptar medidas de control das persoas enfermas, como o illamento domiciliario (actualmente os confinamentos das persoas que están contaxiadas polo coronavirus), o internamento nun centro hospitalario ou o illamento ou internamento noutro lugar adecuado para tal fin.
MEDIDAS DE CONTROL
Entre as sete principais desta 'segunda parte', tamén recolle medidas de control para persoas que estivesen en contacto con persoas enfermas (como actualmente os illamentos de contactos positivos); ou o sometemento a medidas profilácticas de prevención, incluída a vacinación ou inmunización.
Este apartado da lei tamén habilita medidas de control da "contorna inmediata" das persoas enfermas ou que estivesen en contacto con elas, así como de "zonas afectadas" (lugares xeográficos), o que pode levar, por exemplo, a limitación de mobilidade ou circulación (como foron os peches perimetrales de cidades ou áreas sanitarias) ou restricións ás agrupacións de persoas (como o límite nas reunións, tal e como está vixente neste momento en Galicia).
