A UE perde a batalla con AstraZeneca, que terá que entregar menos doses da vacina das que reclamaba Bruxelas

Un tribunal de primeira instancia de Bélxica ordenou este venres á compañía farmacéutica AstraZeneca entregar aos países da Unión Europea un total de 80 millóns de doses da súa vacina contra a Covid-19 ata setembro, unha cifra moi inferior ao que reclamaba Bruxelas cando denunciou ao laboratorio.

A Comisión Europea pedía, tamén en nome dos Vinte e sete, que se condenase á firma anglosueca a entregar 120 millóns de doses antes de que acabase xuño e outros 180 millóns de unidades no tres meses seguintes, para chegar aos 300 millóns de doses acordadas.

Con todo, o fallo do tribunal belga obrigou finalmente a AstraZeneca a entregar aos Estados membros 50 millóns por enriba dos 30 millóns que repartira a finais de marzo, o que eleva a cifra a un total de 80 millóns. Tamén establece unha multa de 10 euros por cada dose non entregada por baixo dos 50 millóns de doses ditados.

Ambas as partes acolleron a sentenza do tribunal de primeira instancia belga como unha vitoria. A farmacéutica celebrou que o fallo non lle obrigue a repartir os 300 millóns de unidades acordadas antes de que acabe setembro e asegura que, como xa distribuíu 70 millóns, poderá superar o limiar establecido polos xuíces nas próximas semanas.

"Ata a data, a compañía distribuíu máis de 70 millóns de doses á Unión Europea e excederá substancialmente os 80,2 millóns de doses para final de xuño", informou o laboratorio anglosueco nun comunicado, no que tamén destaca que "o reto de medidas que perseguía a Comisión Europea foron desestimadas".

AstraZeneca tamén remarcou que a sentenza "recoñece que as dificultades" que experimentou a sociedade "nesta situación sen precedentes" tivo un "impacto substancial no atraso". Da mesma forma, asegura que agora espera "renovar a colaboración" con Bruxelas para "axudar na loita contra a pandemia en Europa".

Pola súa banda, o Executivo comunitario destacou que a sentenza recoñece que o laboratorio anglosueco cometeu "un incumprimento grave" das súas obrigas contractuais. "O tribunal tamén sostén que AstraZeneca debería despregar todos os seus esforzos para repartir as vacinas dentro do calendario acordado, incluíndo as plantas de produción que se mencionan explicitamente no contrato", explica o Executivo comunitario.

Así, Bruxelas recoñece que o fallo do tribunal belga non acepta a súa demanda de obrigar á farmacéutica de entregar á UE os 300 millóns de doses contemplados no contrato nin tampouco establece un calendario para a repartición dos 220 millóns de doses que quedarán por entregar a partir de setembro.

Con todo, os servizos legais do Executivo comunitario celebran que a sentenza lle dá a razón sobre o conflito sobre o contrado.

En consecuencia, a Comisión Europea considera que esta sentenza servirá para que AstraZeneca "acelere" a distribución de dose da súa vacina contra a Covid-19 aos Estados membros do bloque, que era o obxectivo da demanda.