"Temos 10.000 millóns para empresas galegas"

Novagalicia Banco quere inistir na súa vocación de entidade galega. Nos últimos días --e coincidindo co inicio do seu proceso de venda-- teñen aumentado os comunicados nos que se destaca, precisamente, a importancia do banco para a economía do país. Este xoves foi o director comercial da entidade, Gabriel González, quen dixo que a entidade ten "10.000 millóns de euros para prestar ás empresas galegas".

"A actitude que temos é a de apostar por Galicia e pola pequena e mediana empresa, sempre foi esa, antes tiñamos outras e agora estamos centrados só nesta, temos 10.000 millóns de euros para prestar ás empresas galegas", reiterou.

As "posibilidades" do empresariado galego

Por iso animou ao empresariado galego a confiar nas súas posibilidades. "Non hai varita máxica en tempos de crises pero a gran forza tractora serán as pequenas e medianas empresas, a formación de calidade unida a iniciativa, talento e alguén que as acompañe", dixo. Neste sentido, pediulles "anticipación" á hora de solicitar financiamento para as súas iniciativas.

Estas declaracións tiveron lugar nun foro de empresarios no que participaron 120 empresas e que foi organizado de maneira conxunta por Deloitte Avogados e Asesores Tributarios e Novagalicia Banco.