Tes dereito a unha indemnización polos danos causados polo apagamento?
Calquera corte de luz é indemnizable se dura máis de tres minutos, segundo mediadores de seguros galegos.
Por Europa Press / Redacción | SANTIAGO DE COMPOSTELA | 29/04/2025 | Actualizada ás 18:37
Calquera corte de luz é indemnizable se non existe subministración eléctrica durante máis de 3 minutos e non se trata dun apagamento programado para realizar traballos de mantemento na rede. Esta é a definición que traslada o Consello Galego de Mediadores de Seguros nun comunicado, que igualmente indica que se considera como dano eléctrico calquera dano relacionado cun problema na subministración. Para a entidade, o usuario ten dúas vías de indemnización e reclamación: á empresa eléctrica e á compañía de seguros.
Por unha banda, ao subministrador eléctrico pódeselle esixir ata un máximo do 10 % do importe da factura anual. "Aínda que as compañías eléctricas están obrigadas por lei a manter a calidade do servizo e son responsables dos danos ocasionados por fallos na subministración, están exoneradas de responsabilidade se a orixe da falta de electricidade é debido a forza maior non imputable ao provedor", indica a nota da organización.
Por outro, a póliza de seguro 'Multirrisco de Fogar' adoita contar coa cobertura de danos eléctricos. Con ela cóbrese tanto a substitución ou reparación de danos causados nos electrodomésticos por cambios na tensión, como os danos causados aos alimentos ou medicamentos por falta de temperatura axeitada ou outra consecuencia derivada da perda de subministración, exemplifica a entidade. Ademais, no caso dos sectores industriais e a hostalaría, pode entrar en xogo o seguro de interrupción de negocios. Se a póliza contratada contempla estas coberturas, o primeiro paso a seguir é contactar co mediador de seguros e, na súa falta, coa compañía aseguradora.
COMO RECLAMAR DANOS Á ASEGURADORA
Tal e como traslada o Consello Galego de Mediadores de Seguros, só se poden reclamar responsabilidades á aseguradora se se ten unha póliza de protección fronte ao dano e estase ao día no pago das cotas. "Sen un seguro non se pode facer ningunha reclamación, nin á aseguradora nin ao Consorcio de Compensación de Seguros, que asume as indemnizacións en caso de danos extraordinarios", sinala a organización, á vez que indica que o seguro debe estar en vigor como mínimo unha semana antes do sinistro.
Nesta liña, o tomador do seguro debe comunicar o sucedido á súa aseguradora nun prazo de sete días para que o seu mediador traslade o sinistro á compañía. Se se sufriron danos materiais a compañía enviará un perito para valorar as perdas. "Para facilitar o seu exame non hai que tirar nada, é conveniente fotografalo todo e conservar os restos dos bens danados", advirte. Así, se se debe afrontar algunha reparación de urxencia, hai que gardar as facturas para logo reclamar o importe. Tamén aconsella recompilar outras probas que desmostren a orixe e consecuencias do dano, como fotos, noticias, partes da policía, protección civil ou bombeiros.
PAPEL DO CONSORCIO DE COMPENSACIÓN DE SEGUROS
Se o apagamento total que se produciu na Península fose considerado como catastrófico, mesmo podería entrar a indemnizar o Consorcio de Compensación de Seguros, a condición de que o usuario teña unha póliza de seguros en vigor. No caso de non ser considerado 'risco extraordinario', o Consorcio de Compensación de Seguros non se fará cargo das perdas e nese caso a indemnización recae na compañía de seguros. "Algunhas situacións extraordinarias poden estar cubertas polo seguro de fogar, o da comunidade ou do vehículo", engade a organización representante dos mediadores de seguros.
