Aterra en Madrid o último avión con evacuados de Afganistán e persoal do operativo
Un axente da UIP da Coruña forma parte dos 20 membros da Policía Nacional que regresan de Cabul.
Por Europa Press / Redacción | Compostela | 27/08/2021 | Actualizada ás 20:27
O último avión con 195 persoas a bordo con afgáns evacuados e con persoal que participou en todo o operativo, entre diplomáticos, policías e militares, aterrou este venres sobre as 19.25 horas na base aérea de Torrejón de Ardoz. No avión viaxan, ademais do embaixador, Gabriel Ferrán, e outros tres diplomáticos, 20 membros da Policía Nacional e 82 militares españois, segundo fontes gobernamentais.
Un dos axentes da Policía Nacional está destinado na Unidade de Intervención Policial da Coruña. A súa chegada ao aeroporto de Alvedro está prevista para a mañá deste sábado, onde terá un acto de recibimento organizado polo sindicato SUP.
Así mesmo, tamén traslada a catro militares portugueses así como a 19 colaboradores afgáns do país veciño. Ademais, nel chegan os últimos 16 colaboradores afgáns de España e as súas familias aos que se conseguiu sacar, así como 50 da OTAN.
O presidente do Goberno, Pedro Sánchez, acudiu a última hora da tarde á base aérea de Torrejón de Ardoz para recibir ao último avión procedente de Afganistán.
Ademais, segundo fontes gobernamentais, está previsto que Don Felipe tamén se reúna mañá co grupo de traballo interministerial creado expresamente para esta evacuación e que coordina o ministro da Presidencia, Félix Bolaños, para coñecer de primeira man como se desenvolveu toda a operación.
