Máis de cen voluntarios participarán na segunda gran limpeza de fondos mariños da Coruña
Terá lugar o 26 de setembro.
Por Europa Press / Redacción | A CORUÑA | 15/09/2021 | Actualizada ás 20:28
O próximo 26 de setembro, entre as 10,00 e as 14,00 horas, máis de 100 mergulladores participarán na segunda gran limpeza de fondos mariños da Coruña, organizada polo Festival Mar de Mares.
Esta actividade foi presentada, no Castelo de San Antón, este mércores, nun acto que contou coa participación de representantes do Concello da Coruña, Signus, Autoridade Portuaria, Mergullo Galicia e Mar de Mares.
A segunda gran limpeza de fondos mariños da Coruña levará a cabo entre a zona da Dársena da Mariña e o Castelo de San Antón, unha zona de paseo habitual que en 2022 contará cunha área de baño aberta á cidadanía.
A primeira gran limpeza de fondos da Coruña organizada en 2019 polo Festival Mar de Mares contou coa participación de cen persoas voluntarias. En total, recolléronse máis de seis toneladas de residuos e entre os obxectos atopáronse cadeiras de cafetaría, mobles ou un carro de supermercado.
