Conde reitera o seu apoio á proposta de que a fábrica de ENCE forme parte do chan do Porto de Marín
O grupo socialista censura o "despropósito" do Goberno galego neste asunto.
Por Europa Press / Redacción | SANTIAGO DE COMPOSTELA | 29/09/2021 | Actualizada ás 18:39
O vicepresidente segundo e conselleiro de Economía, Empresa e Innovación, Francisco Conde, reiterou este mércores que a Xunta apoiará a proposta trasladada polos traballadores de que a fábrica de ENCE en Lourizán pase a formar parte do chan da Autoridade Portuaria de Marín.
Esta proposta trasladarase ao Consello Consultivo para que analice esta cuestión, que posteriormente se comunicaría ao Goberno central para que contemple esta posibilidade e poida ser avaliada na próxima mesa de Ence.
Así o sinalou en resposta a unha pregunta parlamentaria do grupo socialista, na que criticou que o Goberno central e o Concello de Pontevedra non estean á altura da responsabilidade á hora de buscar unha solución aos traballadores da factoría e a "incerteza" que viven 5.000 familias vinculadas a esta actividade.
"Os únicos buscando unha solución somos nós", insistiu Conde, quen lamentou que PSOE, BNG e o Goberno de Pedro Sánchez "nin están nin se lles espera". Neste sentido, acusou a estas formacións de "xerar un problema" e de pechar a factoría "por unha decisión política" e comprometeuse a buscar unha solución xunto aos traballadores "dentro da legalidade".
Desde o grupo socialista, Paloma Castro incidiu en que non se pode "defender o indefendible" e censurou as "ocorrencias" defendidas pola Xunta para manter o seu emprazamento en Lourizán "mentres falan doutra pasteira". "Non siga enganando", advertiu, para criticar o "despropósito" da postura do Goberno galego nesta materia e lembrar a Conde que da súa xestión depende "o pan de moitas familias".
CASALONGA
Doutra banda, Conde tamén respondeu a outra pregunta no pleno deste mércores relacionada con plan de restauración da canteira de Casalonga, na que o deputado do BNG Luís Bará reclamou á Xunta que actúe para evitar que a zona se converta nun "macrovertedero" de residuos industriais.
O vicepresidente segundo asegurou que o plan presentado pola empresa contempla un uso forestal e que o actual titular da concesión ten o dereito de continuar coa actividade mineira a condición de que proceda con todas as condicións técnicas, urbanísticas e ambientais legalmente establecidas. Neste sentido, explicou que a empresa conta con todas as autorizacións necesarias, polo que a Xunta actuará para velar polo cumprimento da normativa aplicable.
Así, lembrou que o Goberno galego xa desestimou dúas propostas anteriores presentadas pola empresa ao comprobar que non cumprían coas esixencias ambientais, mentres que se autorizou finalmente a terceira actualización do plan que inclúe un uso forestal do terreo.
Bará acusou a Toysal de buscar un emprazamento para levar máis de 10 millóns de toneladas de residuos industriais e de demolición e alertou de que Santiago está "ameazada" por todo un anel de macrovertederos desde Miramontes ata Casalonga.
VERTEDURAS EN MELIDE
Doutra banda, o BNG, a través do deputado Xosé Luís 'Mini' Rivas, reclamou explicacións á Xunta polas medidas adoptadas contra as verteduras contaminantes no regacho Piñor, que leva as súas augas ao río Furelos, procedentes do Polígono da Magdalena de Melide.
O parlamentario nacionalista denunciou "unha derivación" das augas do regacho a través dunha canle de 60 centímetros de ancho, na parte alta dunha extensión de dúas hectáreas con varias regas perpendiculares para "repartir augas contaminantes" por toda a superficie, que está repleta de pozas naturais e patos silvestres.
Respecto diso, a conselleira de Infraestruturas e Mobilidade, Ethel Vázquez, culpou ao Concello de Melide pola mala xestión das redes municipais de saneamento e instou ao BNG a apoiar a Lei de mellora da xestión do ciclo da auga para lograr solucións nesta materia.
Vázquez Mourelle lembrou que a Lei de bases de réxime local outórgalle en exclusiva aos concellos as competencias en abastecemento, sumidoiros e depuración e que, no caso de Melide, a Xunta xa apoia ao Goberno local coa xestión de depuradora desde o ano 2007.
Así mesmo, destacou que a Xunta tamén redactou o proxecto para conectar as augas residuais do polígono da Magdalena coa depuradora municipal que, a pesar de estar concluído desde finais do ano pasado, aínda está pendente de que o Concello poña os terreos a disposición para poder formalizar o convenio e iniciar as obras.
A titular de Infraestruturas insistiu en que esta situación confirma a importancia das auditorías previstas pola Lei do ciclo da auga para detectar deficiencias nas redes de saneamento e corrixilas.
