O PP volverá á Alcaldía da Baña cunha moción de censura con Compromiso para expulsar ao PSOE
O actual alcalde trasladou que, a pesar de que Compromiso apoiou a súa investidura, "nunca" quixo entrar no goberno, aínda que "lle formalizaron" ofertas, e "desde o primeiro pleno xogou un papel de oposición".
Por E.P. | SANTIAGO DE COMPOSTELA | 26/11/2021 | Actualizada ás 19:02
O que xa fose rexedor da Baña durante 24 anos, o popular Andrés García Cardeso, recuperará o bastón de mando municipal da localidade mediante unha moción de censura que rexistrou con Compromiso da Baña e que expulsará da Alcaldía ao socialista José Antonio Pereira.
O pleno municipal está integrado por 11 concelleiros --cinco do PP, catro do PSOE e dous de Compromiso--. Os dous edís de Compromiso e o cinco socialistas uniron as súas forzas para arrebatar a Alcaldía a Pereira, quen, en declaracións a Europa Press, asegurou que non lle "sorprende" o paso formalizado este venres. A moción de censura debaterase o 14 de decembro ás 12,00 horas.
O actual alcalde trasladou que, a pesar de que Compromiso apoiou a súa investidura, "nunca" quixo entrar no goberno, aínda que "lle formalizaron" ofertas, e "desde o primeiro pleno xogou un papel de oposición".
"Desde o principio, a mensaxe foi: igual que te puxemos, podémoste sacar", sentenciou e lamentou que "non hai fundamento real" para o impulso desta moción de censura.
A este respecto, o socialista Gonzalo Caballero emitiu un comunicado no que traslada o seu apoio ao rexedor e afirma que esta moción de censura é "moi negativa para o Concello da Baña", xa que detrás deste procedemento "non hai proxecto", senón "unha suma de intereses que non teñen aos veciños como prioridade".
"SITUACIÓN DE INESTABILIDADE"
Pola súa banda, Compromiso da Baña emitiu un comunicado no que ratifica que o seu secretario local e concelleiro César Ramos, e García Cardeso presentaron a moción de censura, paso que atribúen aos "continuos desprezos á oposición do señor Pereira". "Non deixan outra alternativa que optar por un cambio de goberno", remarcan.
"Manter á fronte do noso Concello a unha persoa coa actitude autoritaria, déspota e antidemocrática do actual alcalde sería un acto de irresponsabilidade", sostén Compromiso, quen alega que A Baña "non se pode permitir seguir nunha situación de inestabilidade provocada única e exclusivamente pola actitude dunha persoa".
Ademais, César Ramos resalta que, co ánimo de reverter a situación, desde a súa formación convidouse o alcalde en reiteradas ocasións a "deixar o seu cargo a algúns dos seus compañeiros de partido", ao entender que "non posúe os coñecementos precisos para xestionar un concello".
"Esta falta de capacidade levou a que en pouco máis de dous anos existisen ata catro informes da Valedora do Pobo reprobando a súa mala xestión, numerosas contratacións de dubidosa legalidade, práctica de política de favores, e feitos susceptibles de constituír delito de revelación de segredos", resolveu.
