A costa galega entra en alerta por temporal este venres
O litoral da Coruña e Lugo estará baixo aviso laranxa, mentres que no caso de pontevedra será amarelo.
Por E.P. | SANTIAGO DE COMPOSTELA | 17/02/2022 | Actualizada ás 14:24
A Dirección Xeral de Emerxencias e Interior da Vicepresidencia da Xunta activou unha alerta laranxa por temporal costeiro para a xornada deste venres no litoral das provincias da Coruña e Lugo. Segundo a Axencia Estatal de Meteoroloxía (AEMET), a partir deste venres ao mediodía empezará un fenómeno meteorolóxico adverso costeiro de nivel laranxa por mar combinado do noroeste con ondas de cinco a seis metros na costa da Coruña e na Mariña lucense.
No litoral de Pontevedra o aviso será de nivel amarelo por mar combinado do noroeste con ondas de catro a cinco metros. Por este motivo e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro Integrado de Atención ás Emerxencias 112Galicia, informou da situación aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entreotros.
A Xunta lembra a importancia de manterse afastado da liña de costa, é dicir, de diques, rompentes e paseos marítimos. Tamén se recomenda que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
