Poetas Di(n)versos acolle este luns a poesía da coruñesa Pura Tejelo e da colombiana Piedad Bonnett

O ciclo de poesía do Concello de Coruña, Poetas Di(n)versos, celebrará o vindeiro luns 28 a súa sesión mensual coa participación dunha "sorprendente" poeta coruñesa, Pura Tejelo e "unha das máis grandes poetas hispánicas contemporáneas", a colombiana Piedad Bonnett.

O ciclo será no auditorio do Centro Ágora a partir das 20,00 horas, con entrada libre e gratuíta, e a encargada de dirixilo será Yolanda Castaño. As autoras estarán dispostas a asinar exemplares dos títulos que ofrecerá unha libraría de proximidade.

A invitada coruñesa Pura Tejelo publicou o seu primeiro libro, 'A elegancia do século', en 2017, co que conseguiu o Premio Johan Carballeira de poesía. Ademais, escribiu outras dúas obras: 'Ashoras de Hanna' e 'Novembro'. A poeta é profesora de Lingua e Literatura e participa en proxectos de innovación educativa e integración con alumnado migrante. Ademais, é xerente da asociación cultural O Facho da Coruña e o ano pasado foi elixida representante do Día da Poesía polo Padroado de Cultura Galega de Montevideo.

En canto a Piedad Bonnett, publicou oito libros de poemas e varias antoloxías que a consagraron como unha das "máis grandes poetas hispánicas actuais" e con máis traxectoria internacional. Así mesmo, trátase dunha escritora con numerosos recoñecementos,como poden ser o Premio Nacional de Poesía do Instituto Colombiano de Cultura ou o Premio Xeración do 27. 

A maiores das súas antoloxías, publicou cinco novelas e un libro testemuñal sobre o suicidio do seu fillo, 'Lo que no tiene nombre', que en 2016 se inclúe no suplemento de Babalia como un dos mellores 100 libros nos últimos 25 anos.

Este será o quinto recital poético da XIII edición anual deste ciclo, o que lle valeu en 2014 o Premio da Crítica de Galicia á Mellor Iniciativa Cultural. Os coloquios van de forma ininterrompida de outubro a xuño.