O IEO emprende unha nova expedición 'Pelacus' para estudar a poboación de sardiña en augas atlánticas ibéricas

O Instituto Español de Oceanografía (IEO) iniciará este sábado unha nova expedición dentro da campaña 'Pelacus' para o estudo da poboación de sardiña en augas atlánticas da Península Ibérica, e que complementa a prospección realizada polo Instituto Portugués do Mar e da Atmosfera (IPMA) desde o pasado 2 de marzo con inicio en Cádiz, a bordo do buque 'Vizconde de Eza'.

O IEO e o IPMA levan a cabo de forma coordinada, desde finais dos 80, o estudo e avaliación da biomasa das poboacións de peixes peláxicos da fachada atlántica e golfo de Biscaia da península Ibérica. Os obxectivos da campaña son a estimación e distribución destas especies e a caracterización do ecosistema peláxico, mediante o método de ecointegración.

A campaña deste ano levarase a cabo no buque oceanográfico 'Vizconde de Eza', que foi pertrechado cunha sonda Ek80, o que o homologa ao resto dos buques que a nivel mundial realizan este tipo de campañas. Ambos os organismos investigadores analizarán conxuntamente os datos que obteñan nas expedicións.

Segundo lembrou o IEO, a poboación de sardiña, tras unha caída durante a segunda década este sigle, recuperouse grazas ao bo recrutamento que tivo lugar no ano 2019. Desde ese ano, a súa biomasa foi aumentando de forma paulatina.

Nesta segunda fase da campaña, os investigadores realizarán prospeccións desde Vigo ata o final da expedición, prevista para o 26 de abril, con chegada ao porto de Santander. O estudo buscará comprobar se a biomasa segue crecendo e se hai indicios da entrada dunha nova cohorte que garanta a continuidade das pesqueiras no curto prazo.

Ademais, analizarase a evolución do resto das especies e realizarase unha caracterización do medio mariño, mediante estacións distribuídas ao longo da área de prospección e, finalmente, anotarase tamén a abundancia de aves mariñas xunto cos residuos de orixe humana.