Movistar Plus+ estrea este xoves a seria 'Rapa', gravada entre Ferrolterra e Ortegal
O traballo audiovisual narra o caso no que Amparo Seoane, a alcaldesa de Cedeira e a muller con máis poder da zona, é asasinada. Investigar o crime vai converterse nunha obsesión para Maite, sarxento da garda civil, e para Tomás, única testemuña do asasinato.
Por E.P. | SANTIAGO DE COMPOSTELA | 16/05/2022 | Actualizada ás 20:10
A serie 'Rapa', producida por Movistar Plus+ en colaboración coa galega Portocabo, estrearase este xoves, 19 de maio, na plataforma dixital. Consta de seis episodios, da man do mesmo equipo creativo da exitosa 'Hierro', a serie máis vista de 2021. Creada por Pepe Coira e Fran Araújo, e dirixida por Jorge Coira xunto a Elena Trapé, está protagonizada por Javier Cámara e Mónica López.
O Teatro Jofre de Ferrol acolleu na tarde deste luns, 16 de maio, desde as 19,15 horas a presentación da serie, coa emisión de primeiro do seis capítulos, onde se deron cita, entre outros o conselleiro de Cultura, Educación, FP e Universidades, Román Rodríguez, o alcalde de Ferrol, Anxo Mato, a delegada da Xunta en Ferrol, Martina Aneiros, ademais doutros rexedores da comarca de Ferrolterra, onde se rodou a serie durante o pasado outono.
O traballo audiovisual narra o caso no que Amparo Seoane, a alcaldesa de Cedeira e a muller con máis poder da zona, é asasinada. Investigar o crime vai converterse nunha obsesión para Maite, sarxento da garda civil, e para Tomás, única testemuña do asasinato.
Para Maite, buscar ao asasino é unha obrigación, é o seu oficio. Para Tomás, que é profesor de Literatura no instituto e a quen ninguén deu vea neste enterro, é a oportunidade de vivir unha historia como as que lle apaixona ler.
Únense a Javier Cámara e Mónica López, os actores Lucía Veiga, Eva Fernández, Toni Salgado, Ricardo de Barreiro, Berta Ojea, Jorge Bosch, Santi Prego, Paula Morado, Adrian Ríos, Iria Sobrado, Perico Asorey, Mabel Rivera, Víctor Mosqueira, Nacho Castaño e Lara Boedo.
AXUDA DA XUNTA
Pola súa banda, o conselleiro Román Rodríguez, ha felicitou a todo o equipo implicado nesta "ambiciosa produción", que puxo como exemplo do enorme potencial de Galicia como escenario de rodaxes, tanto pola súa riqueza paisaxística como pola contrastada calidade dos servizos e profesionais da nosa industria audiovisual.
Neste sentido, a Xunta creou en 2021 un fondo para a atracción de rodaxes dentro da súa Hub Audiovisual da Industria Cultural, da que Rapa foi unha do catro primeiras propostas subvencionadas, cunha achega de 300.000 euros.
A gravación de 'Rapa' supuxo un gasto superior ao tres millóns de euros, que segundo un estudo encargado pola Xunta á Universidade de Santiago de Compostela, está a xerar xa antes da súa estrea un impacto de 5,6 millóns de euros e 85 empregos en termos equivalentes anuais.
Para o conselleiro, 'Rapa' proxectará cara ao exterior o importante legado das nosas tradicións, así como a riqueza e a beleza xeográfica sobre a que se asenta esta trama. "É o poder que teñen as series creadas en territorio galego: ofrecer un escenario incomparable coas máximas facilidades para dar cabida a todo tipo de narrativas", asegurou.
