Morosos galegos coa Agencia Tributaria: Gallega de Pesca Sostenible con 13,2 millons ou Orquetra Sintonía
Tamén figura de novo Martinsa-Fadesa, con case 5,7 millóns.
Por E.P. | Santiago de Compostela | 30/06/2022 | Actualizada ás 20:59
A lista actualizada de debedores coa Agencia Tributaria incorpora a nomes habituais como o exbanqueiro Mario Conde, pero inclúe tamén algunha nova incorporación vinculada con Galicia como é o caso de Gallega de Pesca Sostenible, que se sitúa con 13,2 millóns pendentes de pago.
Ademais, Clesa, que xa estaba na anterior listaxe, debe máis de 6,6 millóns de euros; como figura Factorías Vulcano, cunha débeda de 1,7 millóns; Freiremar, con máis de 5,6 millóns de euros; ou Vialmar Galicia, con máis de 3,5 millóns. Tamén figura de novo Martinsa-Fadesa, con case 5,7 millóns; ou a Orquestra Sintonía, cunha débeda dun millón de euros.
No conxunto do Estado, o comisionista Luís Medina, investigado por suposta estafa ao Concello de Madrid na compra de máscaras durante a pandemia, e o empresario vasco José María Aristrain entraron na lista de contribuíntes que deben a Facenda máis de 600.000 euros, mentres que o adestrador do Real Madrid, Carlo Ancelotti, Twitter e a inmobiliaria Nozar desaparecen dela.
Así, entre estas novas personalidades que entran na lista, Luís Medina Abascal acumula unha débeda co fisco de 653.000 euros, mentres que a débeda do empresario siderúrxico vasco, José María Aristrain, ascende a 1,26 millóns de euros.
Por contra, desaparecen da lista o adestrador do Real Madrid, Carlo Ancelotti, que acumulaba na anterior publicación unha débeda de 1,4 millóns de euros, a inmobiliaria Nozar, que debía 214,88 millóns de euros, ou Twitter, cuxo endebedamento chegou aos 800.000 euros. Tamén saen da lista o Concello de San Fernando ou Lleida Basquet.
Tamén permanecen na lista 'vellos coñecidos' de Facenda, como Agapito García Sánchez, que é un dos contribuíntes que máis debe ao fisco, cunha débeda que supera lixeiramente os 15 millóns de euros; aínda que desde hai un tempo xa non se trata da persoa física máis morosa. Nesta lista os máximos debedores co fisco son os irmáns Ramón e Agustín Olivares, que deben cada un a mesma cifra, 36,8 millóns.
Así mesmo, figuran Teresa Maldonado Taillefer e o seu marido, Jesús Ruiz Casado, propietarios da promotora inmobiliaria Aifos, que deben a Facenda 15,66 millóns de euros e 15,56 millóns de euros, respectivamente, en liña co ano previo.
O cociñeiro Sergi Arola (985.156 euros), o exfutbolista Samuel Eto'o (981.598 euros), o escritor Ildefonso Falcones, con 1,7 millóns, o exsocio de Iñaki Urdangarín, Diego Torres (956.019 euros), ou a actriz María Paz Campos, coñecida como Paz Veiga, que debe a Facenda máis de 3 millóns de euros, tamén repiten na lista.
CÉSAR VIDAL, DANI ALVES E JOSÉ LUÍS MORENO
O expresidente do FMI e exministro de Economía Rodrigo Rato figura, así mesmo, na listaxe cunha débeda de 1,39 millóns de euros, así como o expresidente de Banesto Mario Conde (7,8 millóns), o escritor César Vidal (2,6 millóns), o futbolista Dani Alves (2,08 millóns) ou a comunicadora Patricia Conde (1,04 millóns).
O empresario do espectáculo José Luís Moreno tamén permanece na lista de morosos pero a través da débeda que manteñen as súas empresas Kulteperalia, que debe 950.530 euros, e Alba Adriática, con 1,8 millóns de euros.
REYAL URBIS REPITE COMO A EMPRESA MÁIS MOROSA
En canto ás empresas, unha vez máis Reyal Urbis repite como a compañía que máis diñeiro debe a Facenda, con 310 millóns de euros, que supera con fartura a empresas como Marillion, con 123,5 millóns ou Vittone 1842, con 111 millóns. Entre as empresas que entran na lista, destaca Palemad Reciclaxe, cunha débeda de 127,6 millóns.
Así mesmo, a empresa Tesedul SA, utilizada polo extesorero do PP, Luís Bárcenas, para recorrer á amnistía fiscal segue aparecendo na lista cunha débeda de 1,3 millóns, contía similar á recollida na anterior listaxe.
CLUBS DEPORTIVOS E EU
Na lista tamén figuran clubs deportivos que teñen débedas con Facenda como pode ser o Lleida Esportiu Terraferma Club Fútbol, cunha débeda de 1,69 millóns de euros; o Real Murcia CF, con 10,1 millóns; o Hércules, con 2,39 millóns; e o Xerez Club Deportivo, que debe 8,7 millóns de euros. Destaca tamén Esquerda Unida da Comunidade de Madrid, que eleva aínda máis a súa débeda, con 939.637 euros.
A listaxe de morosos de Facenda abandónase nos casos nos que os debedores reducen a súa débeda por baixo dos 600.000 euros, aínda que se aproxime a esa cifra, ou por outros supostos como cancelacións polo cobro ou por prescrición ou por insolvencia definitiva, entre outros, sen prexuízo de que poidan volver aparecer a posteriori.
Nesta novena lista de morosos da Agencia Tributaria, inclúese un total de 7.037 debedores con Facenda de máis de 600.000 euros a peche de 2021, o que supón un 3,3% menos respecto da pasada lista publicada en decembro.
Segundo os datos facilitados este xoves pola Agencia Tributaria, o importe global de débedas recollido na nova listaxe alcanza os 17.710 millóns de euros, un 2,9% menos, aínda que restando duplicidades --xa que existen importes que corresponden a debedores principais e os seus responsables solidarios--, o importe sería de 14.567 millóns de euros e por tanto, preto dun 4,2% inferior.
