Nova convocatoria destinada a ampliar a rede de casas niño e superar o centenar

O Goberno galego deu luz verde, na súa reunión semanal, á nova orde de axudas para ampliar a actual rede autonómica de casas niño, que ao longo de 2023 alcanzará o centenar de instalacións deste tipo repartidas por toda a Comunidade.

A convocatoria para este exercicio permitirá crear 50 novas prazas, é dicir, 10 novos centros en concellos situados no rural que carezan doutro recurso de conciliación para nenas e nenos de entre 0 e 3 anos.

Para alcanzar este obxectivo, o Goberno galego investirá case 900.000 euros. Desta cantidade, 150.000 euros destinaranse a financiar as obras de acondicionamento dos locais que acollerán estes centros, cun máximo de 15.000 euros por cada un.

Os 720.000 euros restantes diríxense a sufragar os gastos de funcionamento, o que supón unha achega de 21.560 euros para cada promotora ou promotor deste recurso.

Desde a activación desta medida pioneira en 2016, a Xunta apoiou a posta en marcha de 95 casas niño para prestar atención a un total de 475 menores. Estes centros ofrecen atención gratuíta de luns a venres durante un máximo de 8 horas diarias a cinco nenos de 0 a 3 anos de idade.

Reunión do Consello da Xunta.. DAVID CABEZÓN @ XUNTA DE GALICIA | Fonte: Europa Press