Os concursos de méritos deben valorar igual a experiencia no Sergas e noutros sistemas de saúde segundo o TSXG
Trátase dun fallo emitido o pasado 20 de setembro no que os maxistrados deron a razón a unha persoa que recorreu a convocatoria por concurso para o ingreso en varias categorías de facultativo especialista en áre
Por Europa Press / Redacción | SANTIAGO DE COMPOSTELA | 30/10/2023 | Actualizada ás 19:58
A Sala do Contencioso-Administrativo do Tribunal Superior de Xustiza de Galicia (TSXG) obriga a modificar o sistema de puntuación nun proceso selectivo por concurso de méritos no Servizo Galego de Saúde (Sergas), para valorar por igual os servizos prestados en Galicia e en calquera outro servizo do Sistema Nacional de Saúde (SNS).
Trátase dun fallo emitido o pasado 20 de setembro no que os maxistrados deron a razón a unha persoa que recorreu a convocatoria por concurso para o ingreso en varias categorías de facultativo especialista en área --resolución da Dirección Xeral de Recursos Humanos do Sergas do 26 de decembro de 2022--. É un proceso extraordinario de estabilización aberto ao amparo da Lei 20/2021 a nivel estatal.
O recorrente, que exercía no hospital comarcal de Monforte de Lemos e que traballara previamente na sanidade pública de Murcia, presentábase para obter praza na categoría de Obstetricia e Xinecoloxía. Impugnou a convocatoria do concurso porque, mentres o tempo traballado no Sergas puntúa 0,20 por cada mes, no resto de servizos autonómicos valórase á metade, con 0,10 puntos por cada mes.
En cambio, os maxistrados destacan que esta diferenza non existe nun proceso similar de concurso-oposición, tamén convocado polo Sergas ao amparo da lei estatal de estabilización de emprego público. O TSXG admitiu a demanda do recorrente por considerar, citando xurisprudencia do Tribunal Constitucional, que o concepto de "servizos prestados" non é alleo aos de "mérito e capacidade" que establece a Carta Magna.
Os maxistrados entenden que a "sobrevaloración do 100%" nos aspirantes que só traballaron no Sergas e o resto "constitúe unha desproporción non admisible" e que vulnera dereitos fundamentais. Así, o TSXG estimou o recurso e anulou o apartado da baremación, á vez que obriga á Administración a modificala para equiparar a puntuación do tempo traballado no Sergas e en otas comunidades autónomas.
A XUNTA RECORRE ANTE O SUPREMO
Fontes da Consellería de Sanidade consultadas por Europa Press confirman que contra esta sentenza hai un recurso presentado ante o Tribunal Supremo. A Xunta defende que o sistema de valoración non só foi aprobado en mesa sectorial --cos sindicatos máis representantivos--, senón que é un criterio "que se está aplicando xa na maior parte das comunidades autónomas" nos respectivos concursos de méritos para estabilizar persoal.
Ademais, na liña da defensa do Sergas durante o proceso xudicial, a Administración argumenta que hai unha lei autonómica (a 5/2022) que permite realizar esta diferenza de puntuación. O concurso de méritos afectado polo fallo --o de facultativo especialista de área-- aínda non está finalizado, pero as mesmas fontes de Sanidade insisten en que, por agora e pese ao pau xudicial, leste e outros procesos coas mesmas baremaciones seguen adiante.
