Repsol non poderá ampliar a rede de gasolineiras en Galicia en 2024 por superar o 30% de cota
Por E.P. | Santiago | 01/12/2023 | Actualizada ás 16:32
Repsol non poderá incrementar o número de estacións de servizo durante un ano en 33 provincias --entre as que se atopan as cuatra galegas--, illas ou cidades autónomas ao superar a cota de mercado do 30%, o limiar establecido para limitar este crecemento empresarial na normativa sobre competencia no sector de hidrocarburos.
En concreto, os territorios nos que a petroleira non poderá crecer son: Albacete, Asturias, Ávila, Badaxoz, Illas Baleares, Cáceres, Cidade Real, Córdoba, A Coruña, Cuenca, Guadalaxara, Huelva, Huesca, Jaén, León, Lleida, Lugo, Madrid, Ourense, Palencia, Pontevedra, La Rioja, Salamanca, Segovia, Soria, Teruel, Toledo, Valladolid, Vizcaya e Zaragoza, así como as illas de Formentera, Eivissa e Mallorca, segundo consta nunha resolución da Dirección Xeral de Política Enerxética e Minas publicada este venres no Boletín Oficial do Estado (BOE).
No caso da petroleira Cepsa, as limitacións ao seu crecemento quedan restrinxidas a tres territorios: as illas de Formentera, Eivissa e Menorca. Mentres, Disa terá limitada a expansión na provincia de Santa Cruz de Tenerife, nas illas de Forteventura, A Palma, Lanzarote, A Gomera e El Hierro, así como en Ceuta e Melilla.
A Lei 8/2015, de 21 de maio, establece que os operadores cunha cota de mercado superior ao 30% non poderán incrementar o número de instalacións en réxime de propiedade ou en virtude de calquera outro título que lles confira a xestión directa ou indirecta da instalación.
Tampouco poderán subscribir novos contratos de distribución en exclusiva con distribuidores polo miúdo que se dediquen á explotación da instalación para a subministración de combustibles e carburantes a vehículos, con independencia de quen ostente a titularidade ou dereito real sobre a mesma.
