A ministra de Sanidade di que a lei de amnistía "é boa" porque reforza "a confianza" no país

A ministra de Sanidade, Mónica García, defendeu este venres que a lei de amnistía "é unha boa lei", que vén reforzar " a convivencia" e a "confianza" no país, e que o Goberno "demostrou que quere "traballar para os españois".

Así o trasladou a preguntas dos medios, sobre se haberá finalmente amnistía despois de que a norma non prosperase no Congreso polo voto contrario de Junts, e antes de participar nun acto electoral con colectivos de sanidade, no que acompañou á candidata de Sumar Galicia á presidencia da Xunta, Marta Lois.

Segundo sinalou, a lei de amnistía é "unha boa lei" e, ademais de "reforzar a convivencia", vén reforzar a "confianza" no país e nas "distintas sensibilidades". Con todo, engadiu que, "independentemente do que pase coa lei", o Goberno "demostrou que veu para traballar para os españois".

En concreto, puntualizou que o Ministerio de Sanidade traballa para apontoar "unha das principais preocupacións e orgullo" dos cidadáns, que é a sanidade pública. "Imos seguir traballando para o que viñemos, que é para mellorar a vida da xente. Este é o último obxectivo dos que somos representantes públicos", resolveu.

"CAMBIO DE PARADIGMA"

A ministra de Sanidade, Mónica García, apelou este venres á necesidade de que haxa un "cambio de paradigma" no modelo de atención sanitaria en Galicia, e subliñou que son necesarios gobernos "que crean na súa sanidade" e que "coiden aos seus profesionais".

A ministra reiterou a mensaxe de que "se entra Sumar, sae o PP, sae Rueda" da Xunta de Galicia, e advertiu de que "hai quen quere" que as eleccións galegas do 18 de febreiro sexan "unha especie de segunda rolda, de segunda volta do que non puido ser o 23 de xullo". "Non, estas eleccións van dos galegos, da súa sanidade, da súa vida, o seu benestar", puntualizou.

Mónica García tamén quixo enviar unha mensaxe a Feijóo, por insinuar que "non se fala de sanidade" con motivo destes comicios. "Non, señor Feijóo. Non falará vostede de sanidade, porque claro, leouse, entre tanto terrorismo, tanto 'rompe España' e tanto apocalipse. Nós si falamos de sanidade", sentenciou.

Nese sentido, subliñou que as eleccións galegas "van de ter máis ou menos pediatras, de esperar 8 meses ou unhas semanas, de ter cita no médico de Atención Primaria en dous días ou dúas semanas". Respecto diso, reivindicou que o obxectivo de Sumar é, tamén en Galicia, "mellorar a vida da xente".

RECUPERAR O "ORGULLO" POLA SANIDADE PÚBLICA

Mónica García recalcou que o Ministerio de Sanidade traballa para fortalecer esa Atención Primaria, para reforzar a atención á saúde mental e para que o sistema nacional de saúde "volva ser o orgullo, a xoia da coroa do Estado de Benestar".

Nese sentido, lamentou que os anos de goberno do PP en España foron "moi dolorosos" para a sanidade pública e lamentou houbo gobernos que fixeron gala de "os recortes, as privatizacións e a mala xestión". 

XIRO DE 180 GRAOS TRAS ANOS DE "MALOS TRATOS"

Pola súa banda, a candidata á presidencia da Xunta, Marta Lois, apostou por dar "un xiro de 180 graos" á sanidade pública galega, tras 14 anos de "malos tratos e desmantelamento" por parte, primeiro de Feijóo, e logo do "presidente non electo" Alfonso Rueda.

A candidata repetiu a aposta de Sumar Galicia por "políticas útiles, que melloren a vida da xente" e incidiu en que, se os galegos votan o 18F igual que o fixeron o pasado 23 de xullo, haberá "un cambio histórico". Por iso, insistiu en que a súa formación terá un "rol decisivo" para que Rueda "salga da Xunta".

Marta Lois tamén lembrou algunhas das principais apostas de Sumar para o ámbito sanitario, entre as que destacou o reforzo da Pediatría para que o máximo de tempo en conseguir unha cita sexa de 2 días; aumentar os recursos e investimento, tanto en infraestruturas como en persoal; ou garantir o dereito á atención xinecolóxica adecuada no sistema público.

Finalmente, tras reafirmar que, "por suposto", Sumar Galicia estará o domingo na manifestación en defensa da sanidade pública, reiterou que "os galegos están fartos das mentiras do PP e da manipulación de Rueda" e así o demostrarán no acto do domingo, que vai ser "un clamor".