Máis de 2.800 estudantes enfróntanse desde este martes á ABAU extraordinaria en Galicia
Os aprobados nesta convocatoria poderán preinscribirse nos graos do 17 ao 22 de xullo e matricularse a partir do cuarto listado de admitidos.
Por Europa Press / Redacción | SANTIAGO DE COMPOSTELA | 01/07/2024 | Actualizada ás 14:13
A convocatoria extraordinaria da Avaliación do Bacharelato para ou Acceso á Universidade (ABAU) en Galicia celebrarase entre estes martes e xoves, do 2 ao 4 de xullo, cun total de 2.827 estudantes que están matriculados. Todos eses alumnos acudirán a examinarse a 14 comisións delegadas repartidas por toda a xeografía galega. En realidade hai habilitadas 15, pero a do Colexio Santiago Apóstolo de Pontevedra, destinada a persoas con discapacidade, non acollerá a ningún aspirante nesta convocatoria.
Igual que na ordinaria, celebrada entre o 4 e o 6 de xuño, a maioría do alumnado acudirá a realizar a ABAU a facultades das principais cidades galegas. Máis da metade repartirase entre Vigo (634 estudantes), Santiago de Compostela (608) e A Coruña (523). Ademais, en Pontevedra farán os exames 272 mozos, en Ourense 260, en Ferrol 213 e en Lugo 206. Tamén haberá comisións delegadas periféricas, para evitar longos desprazamentos, no IES Vilar Ponte de Viveiro (Lugo), con 45 aspirantes; no IES Agra de Raíces de Cee (A Coruña), con 41; e no IES Cosme López Rodríguez da Rúa (Ourense), con 25.
As notas coñeceranas para a semana, o xoves 11 de xullo, e a preinscrición nos graos universitarios abrirase para eles o día 17. A ABAU ordinaria alcanzou unha porcentaxe de aprobados na fase xeral do 96 por cento. A Comisión Interuniversitaria de Galicia (CiUG) atópase agora inmersa no proceso de preinscrición, que se pecha precisamente este luns, das persoas que aprobaron a convocatoria ordinaria.
Unha vez realizado isto, entre os meses de xullo e outubro iranse publicando progresivamente ata nove listados de admitidos nos graos universitarios galegos. Os primeiras sairán o martes 9 de xullo, coa posibilidade de matricularse entre o 10 e o 11. Aínda que a tendencia dos últimos anos é que a maioría das carreiras xa pechan a admisión no primeiro chamamento, aínda haberá algúns máis para cubrir as prazas que quedan: o segundo o luns 15 de xullo, con matrícula do 16 ao 17; e o terceiro o venres 19 de xullo, con prazo para formalizar a inscrición do 20 ao 22. Na cuarta chamada, que será o 24 de xullo, xa se poderán unir os que aproben a ABAU extraordinaria desta semana.
