Galicia xa ten baixo a súa tutela aos 28 menores migrantes non acompañados chegados en agosto

Os 28 menores migrantes non acompañados acollidos en Galicia segundo o acordo de distribución da Conferencia Sectorial de 2023, cuxa chegada estaba programada en dúas quendas durante o mes de agosto, atópanse xa todos na comunidade, baixo a tutela da Xunta e integrados na rede autonómica de protección aos menores.

Segundo confirmaron a Europa Press fontes da Consellería de Política Social, a chegada desenvolveuse como estaba previsto, 14 deles na primeira quincena do mes e outros 14 que chegaron o pasado mércores. O primeiro dos grupos correspondíase con nenos de menor idade, xa que todos eles estaban por baixo dos 13 anos. O segundo grupo compóñeno menores de entre 13 e 17 anos, practicamente ao 50 % nenos e nenas. En canto á súa orixe, proceden de Senegal, Mali, Marrocos, Conakri, Gambia e Mauritania.

Os menores están distribuídos nos distintos centros dos que dispón a Xunta, un modelo, o galego, composto por 70 centros de pequeno tamaño entre os que os recentemente chegados están distribuídos para facilitar a súa integración con outros menores e, a longo prazo, na sociedade galega. Na actualidade, a Xunta está en conversacións co Goberno, Canarias e Ceuta para liquidar a repartición correspondente á conferencia de 2024, algo para o que aínda non hai data.

RUEDA NEGA QUE GALICIA ESTEA XA DESBORDADA

O presidente da Xunta, Alfonso Rueda, criticou este luns que o Goberno central non ten "ningún criterio" para a distribución entre as comunidades autónomas de migrantes que chegan a España, pero negou que Galicia estea xa desbordada. "En ningún caso negámonos nin dixemos que aquí non cabía unha persoa. En absoluto, o que queremos é atendelas ben. Se veñen sen criterio non será posible atendelas ben e desbordaranse as posibilidades para facelo", respondeu, ao ser preguntado sobre as súas palabras a semana pasada acerca dun "aluvión sen criterio" co que o Estado realiza a repartición.

"Aluvión no sentido de que están a chegar persoas ao noso territorio sen criterio. E se o hai, que o expliquen", dixo o mandatario galego este luns. Neste sentido, asegurou que a Administración autonómica ten coñecemento "con moi pouca antelación" sobre a chegada destas persoas, á vez que agradeceu a "absoluta lealdade" do delegado do Goberno en Galicia, Pedro Blanco, ao informarlles. "Outra cousa é a información que lle dan", apostilou.

En calquera caso, Alfonso Rueda non cre que esta situación xere unha alarma. "Alarma pode crear a falta dunha política migratoria por quen ten que tela, que é o Goberno central", dixo, antes de censurar que o presidente, Pedro Sánchez, realizase visitas a distintos países de África "a dicir unha cousa e ao día seguinte a contraria" sobre a migración. O único criterio que observa o presidente da Xunta é "a dispoñibilidade de prazas hoteleiras". Tampouco sabe "que espera facer" con estas persoas o Executivo central, quizáis (en palabras de Rueda) "que se vaian do territorio ou acaben onde poidan".

PROGRAMA CON MIGRANTES EN SITUACIÓN IRREGULAR

En calquera caso, o presidente galego destacou diversas iniciativas postas en marcha polo seu goberno para a inserción destas persoas. A modo de exemplo puxo a aprobación este luns da firma de tres convenios de colaboración para dar continuidade a un programa formativo que buscará o arraigamento de 145 migrantes en situación irregular. En concreto, os acordos ratificaranse con Cáritas Federadas en Galicia, con Cáritas Diocesana de Lugo e coa Federación de Escolas Familiares Agrarias (EFA), segundo avanzou este luns o presidente da Xunta, Alfonso Rueda, tras a reunión semanal do Consello.

Esta segunda edición suporá un orzamento total dun millón de euros e chega despois de que nunha primeira fase participasen máis dun cento de persoas que recibiron formación en campos como a hostalaría, o turismo, a atención sociosanitaria, a gandaría e a limpeza, entre outros. Delas, un 70 por cento conseguiu traballo indefinido.

OUTRAS INICIATIVAS DE EMPREGO

Tamén no plano laboral, o Goberno galego aprobou este luns pór en marcha, por case 12,3 millóns de euros, unha rede "pioneira" de centros asociados de formación para o emprego (complementarios aos públicos), co obxectivo de garantir unha maior adaptación do mercado laboral ás necesidades das empresas. En palabras de Rueda, Galicia será así "a primeira comunidade" en establecer unha rede para impartir a desempregados formación profesional dos graos A, B e C en oito das especialidades máis demandadas nestes momentos, entre elas a naval, a obra civil, a pesca e o sector forestal.

Así mesmo, a Xunta resolveu a última convocatoria do programa de formación dual en centros especiais de emprego, do que se beneficiaron seis centros con que contribúen á inserción de 90 persoas con discapacidade intelectual, 30 máis que a convocatoria anterior. A achega autonómica concedida supera os 3,3 millóns de euros. A maiores, o Goberno galego autorizou este luns impulsar unha nova edición do programa 'Xuventude Mentoring' para o período 2024-2025, ao cal se destinarán un millón de euros. Esta iniciativa, na que participaron unhas 750 persoas desde 2021, pretende pór en contacto a través de diferentes accións a xente nova con empresas.