O PSdeG esixe á Xunta cubrir o 100% do canon de Sogama: "Rueda contamina, Rueda paga"
"A que está a contaminar é a Xunta porque continúa incinerando e enterrando residuos en vertedoiro: se Rueda contamina, Rueda debe pagar", dixo a deputada socialista Paloma Castro
Por Europa Press / Redacción | SANTIAGO DE COMPOSTELA | 12/09/2024 | Actualizada ás 18:05
O PSdeG reclamou ao presidente da Xunta, Alfonso Rueda, que o seu Goberno asuma o cento por cento do canon de Sogama con fondos propios, "sen recorrer a máis recortes en servizos sociais aos concellos ou sen que sexan os veciños e veciñas os que paguen a "mala praxe" do PP.
Nun comunicado remitido aos medios, a portavoz de Medio Ambiente na Cámara galega, Paloma Castro, sostivo que "o que contamina, paga". "A que está a contaminar é a Xunta porque continúa incinerando e enterrando residuos en vertedoiro: se Rueda contamina, Rueda debe pagar", dixo.
A parlamentaria socialista denunciou que "a Xunta recada este canon tras unha mala xestión dos residuos, e agora pretende presentarse como benefactor decidindo que pagará unha parte. "Non se pode ter menos vergoña", sinalou.
Os socialistas acusan á Xunta de ser a responsable do incremento deste canon debido á súa "deficiente xestión de residuos" e esixen que o custo sexa cuberto "integramente polo goberno autonómico e con cargo a fondo propios e non ao Fondo de Cooperación Local" para evitar que se "asfixie aos concellos con asuntos que son competencia directa do Goberno autonómico".
O PSdeG lembra que o secretario xeral, José Ramón Gómez Besteiro, xa lle reclamou o pasado luns á Xunta que asumise o custo íntegro da subida do recibo do lixo.
E é que Paloma Castro cualificou de "delirante" o anunico de Rueda de que a Xunta asumiaría parte do aumento ao asgurar que se trata dunha medida "tardía, insuficiente e enganosa".
"En lugar destas solucións parciais", a parlamentaria insistiu en que o que debe facer o Goberno galego é suprimir o incremento do recibo do canon para todos os galegos e afrontar os sobrecustos co imposto que recada.
Ademais, o PSdeG esixiu un "cambio radical" no modelo de xestión de residuos en Galicia para "afastarse" de prácticas como a incineración e o depósito en vertedoiro, e optar por solucións máis sustentables e respectuosas co medio ambiente.
