O orzamento do Bono Concilia aumenta ata os 2,6 millóns e inclúe a nenos de 13 anos

O presidente da Xunta, Alfonso Rueda, anunciou o incremento de máis dun 60 % do orzamento inicial do Bono Concilia Familia na convocatoria deste ano, ata alcanzar os 2,6 millóns de euros, para así incluír tamén a nenos de ata 13 anos de idade. Tal como sinalou o líder autonómico na rolda de prensa posterior ao Consello deste luns, este Bono está pensado para facilitar a conciliación ás familias con nenos onde os dous proxenitores traballan, ampliándose nesta edición a todos os nenos que cumpren este 2024 os 13 anos.

Por iso, o Diario Oficial de Galicia (DOG) publicará este martes a nova convocatoria destas axudas, que poderán solicitarse a partir do mércores e ata o 17 de outubro. O presidente galego subliñou que o obxectivo deste programa é que os pais e nais poidan atender as súas necesidades de conciliación de carácter puntual. Por exemplo, por enfermidade ou cuestións laborais, ou durante os períodos de vacacións escolares.

As contías poden ser de ata 500 euros por unidade familiar para a contratación dunha persoa empregada no fogar ou servizos de atención á infancia a domicilio, ou de 200 euros por neno para o pago de campamentos ou doutros recursos de conciliación, como ludotecas ou espazos infantís. Entre as novidades, ademais do incremento orzamentario inicial, a convocatoria amplía de 12 a 13 a idade máxima dos nenos que poden dispor destas axudas. Así mesmo, faise máis sinxela a solicitude para axilizar a súa tramitación e o seu pago.

A lectura en familia, compartida, con contos ou libros guiados é a mellor forma de socializar aos nenos | Fonte: Arquivo