Roberto Barba remarca que a vítima debe estar arroupada por un sistema pontente para poder denunciar

O director xeral de Loita contra a Violencia de Xénero, Roberto Barba, fixo fincapé este xoves no Parlamento na necesidade de apostar por reforzar os recursos, os xulgados especializados e a formación en asistencia a vítimas de violencia machista, lembrando que "a vítima, para denunciar, ten que estar arroupada por un sistema potente".

Así o dixo Barba durante a súa comparecencia no Parlamento para presentar o informe anual correspondente ao ano 2023 de seguimento da Lei 11/2007 para a prevención e o tratamento integral da violencia de xénero, así como dos informes de violencia sexual e prestacións periódicas.

Nas súas intervencións, chamou a atención sobre o incremento nas denuncias por violencia de xénero, algo que, dixo, obedece, sobre todo, a que as vítimas se senten arroupadas para denunciar a súa situación a través do sistema.

"A vítima para denunciar ten que estar arroupada por un sistema potente, se non, non denuncia. Por iso que haxa máis denuncias non é algo negativo en si mesmo", dixo Barba que, como ex-xuíz, estivo de acordo na necesidade de implantar máis xulgados especializados en violencia de xénero, así como en reforzar a formación de todos os intervenientes no proceso relacionado coas vítimas. De feito, explicou que "é imposible loitar contra a violencia de xénero sen unha maior formación".

Ademais, o director xeral destacou a aposta da Xunta polos centros de crises 24 horas, onde se atenderá de forma especializada ás vítimas de violencia de xénero, que recibirán axuda psicolóxica, xurídica e social os 365 días do ano. Galicia, dixo, contará antes de que finalice o ano con cinco centros deste tipo nas cidades de Ferrol, Santiago, Lugo, Pontevedra e Ourense; que contan cun investimento da Xunta de 11 millóns de euros.

Por outra banda, no capítulo da violencia sexual, presentou o informe cos datos do ano pasado, nos que se reflicten 924 delitos deste tipo en Galicia, un 20% máis que en 2022. A pesar do incremento, subliñou que a galega é a quinta comunidade do Estado con menos delitos de índole sexual e que o catro provincias están por baixo da media estatal.

"DEGRADACIÓN" DA ÁREA DE IGUALDADE

Na súa quenda de intervención, as representantes dos grupos socialista e nacionalista criticaron a reorganización da Xunta que derivou na creación da Dirección Xeral de Loita contra a Violencia de Xénero, que ambas viron como unha "degradación" das políticas de igualdade dentro do Goberno galego.

Tanto Olaia Rodil (BNG) como Paloma Castro (PSdeG) consideraron que o departamento de Igualdade debería permanecer como unha Secretaría Xeral, ligada á Presidencia da Xunta, tendo en conta que se trata de "políticas transversais" a todo o goberno galego. "Trátase dun retroceso de máis de 20 anos", afeou Rodil.

A xestión privada dos futuros centros de crises para vítimas de violencia de xénero tamén acapararon as críticas tanto do BNG como do PSdeG, que reclamaron máis xulgados especializados e máis formación en materia de igualdade e violencia de xénero en todos os niveis.

Na súa quenda, Paloma Castro fixo unha referencia específica ao incremento dos delitos de agresión sexual o pasado ano en Galicia, algo que "demostra que a pesar dos avances normativos, aínda queda moito que facer". Neste sentido, reclamou a implantación de educación sexual desde a etapa escolar, o control no acceso á pornografía por parte de menores e a abolición da prostitución, xa que "se os homes cren que a cambio de diñeiro poden aproveitarse de mulleres vulnerables, estamos blanqueando as agresións sexuais".

Olaia Rodil, pola súa banda, lamentou que, pese ao incremento continuado no número de denuncias por violencia de xénero e por violencia sexual, "non hai un correlato na cifra de usuarias dos recursos" nin "na formación do persoal".

Intervención de Roberto Barba na Comisión de Sanidade.. XUNTA | Fonte: Europa Press