O Concello de Ourense recorta o horario de uso de parques infantís e pistas deportivas ata as 22 horas
Para conciliar o xogo e a práctica deportiva co "respecto ao dereito ao descando dos veciños".
Por Europa Press / Redacción | SANTIAGO DE COMPOSTELA | 23/09/2024 | Actualizada ás 13:08
O Concello de Ourense axustou desde este luns os horarios dos parques infantís desde outubro ata maio. Deste xeito, o horario de apertura destes espazos será desde as 08,00 horas ata as 22,00 horas.
Nunha nota de prensa, o goberno local detallou que estes horarios tamén se aplicarán ás pistas deportivas cuxo uso "poida xerar ruído e molestias aos veciños", como é o caso daquelas dedicadas á práctica de deportes de balón, excepto os equipos federados.
Por tanto, fixo fincapé en que este novo horario non se aplicará a aquelas prácticas deportivas que "non ocasionan ruídos", como correr ou a calistenia, entre outros.
Con todo, o alcalde ourensán, Gonzalo Pérez Jácome, asegurou que "confía" en que estas medidas sirvan para conciliar o xogo e a práctica deportiva na cidade con "o respecto ao dereito ao descanso dos veciños" daquelas zonas nas que se atopan estes espazos.
