As axudas contra a enfermidade hemorraxia epizoótica pagaranse ao final do período de actividade do mosquito

A conselleira de Medio Rural, María José Gómez, trasladou que a Xunta fará efectivas as axudas para paliar os danos da enfermidade hemorráxica epizoótica unha vez que termine o período de actividade do mosquito vector transmisor desta enfermidade, que se estima que se produza a mediados de novembro, coa baixada de temperaturas.

Así o detallou tras reunirse cos responsables de Asaga e Unións Agrarias en Ourense, nun encontro de traballo no que explicou que os fondos, 5,6 millóns de euros cofinanciados polo Ministerio de Agricultura, poderán chegar a todas as explotacións afectadas.

O modo de repartición, explicou, será directo aos gandeiros, que tan só terán que presentar a aceptación da axuda "sen necesidade de achegar ningunha outra documentación", para axilizar ao máximo a tramitación.

A conselleira agradeceu a colaboración e disposición de ambas as organizacións agrarias para traballar da man do Executivo galego "en estreito contacto cos gandeiros", para facer fronte á situación e elaborar esta proposta de axudas que definiu como "a máis ambiciosa de todas as comunidades autónomas".

Así mesmo, resaltou que Galicia foi pioneira en habilitar a comezos deste ano a indemnización por animais falecidos. Nesta liña, lembrou que desde o Ministerio de Agricultura anunciouse en maio un Real Decreto para transferir fondos ás autonomías, algo que se fixo efectivo a semana pasada.

Por iso, Gómez expuxo que a partir da publicación desa norma, e unha vez coñecidos os criterios do Ministerio, foi cando a Xunta puido "avanzar e dar certezas" aos gandeiros cunha proposta de axudas directas.

"Non hai ninguén máis preocupado e ocupado co benestar, o coidado e a sanidade das reses que os gandeiros", incidiu a conselleira, á vez que engadiu que a Xunta "está para axudar a que todos sigan á fronte as súas explotacións".

Unha vaca afectada pola EHE nunha explotación de Molmeán | Fonte: Cedida Ana Álvarez