Por E.P. | SANTIAGO DE COMPOSTELA | 11/10/2024 | Actualizada ás 16:37
O conselleiro de Facenda, Miguel Corgos, queixouse da "incerteza" que padece o Goberno galego para elaborar as contas de 2025 por ausencia dunha senda oficial de obxectivos de déficit do Estado. Critica que "falten 'inputs" para a súa elaboración como "cal será a evolución da masa salarial para o ano que vén", o que "obrigará a contar con algunha serie de fondos de contigencia no orzamento en previsión das decisións definitivas do PGE, se é que se aproban este ano". Diso informou tras senllas reunións este venres con representantes dos sindicatos e a patronal para informar as liñas mestras destes orzamentos que a Xunta presentará a próxima semana.
Preguntado polas diferentes reivindicacións dos axentes sociais, Corgos dixo que "sempre" toman nota e tómase "moi en serio" a súa opinión. Así, avanzou que a Xunta "reforzará o financiamento das corporacións locais nos orzamentos".
Igualmente, remarca que se guiaron pola "prudencia" nas estimacións, á vez que reiterou as previsións dun crecemento do Produto Interior Bruto (PIB) do 2,1% para 2025, o que confirma un crecemento "continuado desde fai cinco anos". "Seguiremos xerando emprego", cunha taxa de desemprego que roldará o 9,1%, "despois de baixar este ano por primeira vez do 10%".
A isto súmase unhas contas "sen endebedamento" nun "marco de incerteza en elaboracion das débedas", pois Corgos considera "importante que as incertezas no contexto económico non se trasladen a empresas nin familias".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.