As obras de seguridade no túnel de Folgoso, na Cañiza, desviarán o tráfico a partir do luns
Desta maneira, abrirase un desvío alternativo en ambos os sentidos, Vigo e Ourense, entre os quilómetros 269,7 e 281,8, a través das estradas N-120 e N-559
Por Europa Press / Redacción | VIGO | 17/10/2024 | Actualizada ás 13:22
O Ministerio de Transportes e Mobilidade Sustentable vai acometer obras de mellora do equipamento de seguridade no túnel de Folgoso, na autovía A-52 ao seu paso pola Cañiza, as cales obrigarán a desviar o tráfico a partir do luns, día 21 de outubro.
En concreto, os cortes realizaranse desde as 09.00 horas deste luns e ata as 00.00 horas do día 26. Desta maneira, abrirase un desvío alternativo en ambos os sentidos, Vigo e Ourense, entre os quilómetros 269,7 e 281,8, a través das estradas N-120 e N-559.
Nun comunicado, o Ministerio explicou que os traballos se enmarcan nun contrato de obras de emerxencia para a reparación de danos e a adopción de medidas paliativas, como consecuencia dos temporais Ciarán e Domingos, e do incendio ocorrido no interior do túnel. Un túnel que se trata do máis longo da rede de estradas do Estado en Galicia, con 2.550 metros.
