Sanidade ve a gripe "de baixo risco", cun 15% de ingresos por urxencias
O BNG lamenta a morte dunha exedila en Ponteareas diagnosticada de cancro con "meses" de atraso: "Non é un caso illado"
Por Europa Press / Redacción | SANTIAGO DE COMPOSTELA | 29/01/2025 | Actualizada ás 19:54
O conselleiro de Sanidade, Antonio Gómez Caamaño, asegurou que a onda de gripe está actualmente en "unha situación estable e de baixo risco", porque as urxencias levan "varios días en descenso" e "só o 15 por cento" derivan nun ingreso. Ademais, desvelou que, das 600 camas a maiores habilitadas ao amparo do plan de inverno do Servizo Galego de Saúde (Sergas), están despregadas "pouco máis da metade".
Así o explicou este mércores o conselleiro ao responder a unha interpelación formulada no pleno do Parlamento galego pola deputada do BNG Montse Prado. "Nestes momentos, non hai saturación nin colapso ningún", asegurou o conselleiro, quen no entanto prometeu non "baixar a garda" porque están "preparados ante un eventual incremento da incidencia".
"A situación de normalidade só vena vostedes", espetáballe anteriormente a deputada nacionalista, quen criticou que "os problemas da sanidade van desde A Mariña a Vigo, e desde Valdeorras á Barbanza". Prado cuestionou o plan de inverno aprobado por Sanidade, porque espera a que "estea todo colapsado para habilitar camas ou contratar persoal". "Non hai un auténtico sistema de vixilancia", apostilou.
"A PERCEPCIÓN GLOBAL" É MENOS SATURACIÓN
O conselleiro comezou por agradecer o traballo de todo o persoal do Sergas "nun contexto de déficit de profesionais" e de "incremento da demanda". Así, Gómez Caamaño referiuse ao plan de inverno como "pioneiro" e asegurou que "a percepción global" da poboación galega é que o Sergas está menos saturado "que en anos anteriores". Este plan, que inclúe medidas comúns para todas as áreas sanitarias, permite tamén aumentar as retribucións de gardas e de intersustituciones realizadas polos profesionais para atender a subida de demanda.
O titular de Sanidade lamentou que a deputada do BNG acuda ao pleno co seu "argumentario de colapso e apocalipse, neste caso microbiológico". Posteriormente, defendeu que o aumento da presión asistencial que se produce durante o inverno, "non é culpa da Xunta, nin do conselleiro de Sanidade, nin do PP", senón "do virus da gripe".
"NON PLANIFICAR"
"Claro que non teñen culpa de que veña o virus, teñen culpa de non planificar", respondíalle posteriormente Montse Prado, quen sacou no pleno o caso de Lola Covelo, unha exconcelleira do BNG en Ponteareas que pasou "meses" ata que foi diagnosticada dun cancro.
Na súa necrolóxica, figuraba a seguinte inscrición: "Voume cos 57 recentemente estreados (con gran axuda das mans 'privadas' que xestionan a sanidade 'pública)". Montse Prado asegurou que a familia "pediu" ao partido que o fixese público. "Desgraciadamente, non é un caso illado e poderíalle falar dunhas cantas Lolas", engadiu. O conselleiro de Sanidade lamentou "moitísimo" este falecemento, non sen reprochar á deputada nacionalista que "utilice un drama persoal para facer política". "Non vou caer nese circo", engadiu.
