Detida por lucrarse alugando pisos vacacionais falsos en Gandía por internet
Os prexudicados púñanse en contacto vía mensaxería instantánea e realizaban o ingreso a través dunha pasarela de pagos
Por Europa Press / Redacción | SANTIAGO DE COMPOSTELA | 30/01/2025 | Actualizada ás 13:14
Unha muller residente en Toledo foi investigada pola Ertzaintza acusada de estafar a 20 persoas, unha delas en Ourense, cun anuncio falso en internet de aquiler vacacional na localidade de Gandía. Os prexudicados púñanse en contacto coa suposta estafadora vía mensaxería instantánea e realizaban o ingreso a través dunha pasarela de pagos.
Segundo informou a Delegación do Goberno no País Vasco, a investigación correu a cargo do equipo @-Edite da Garda Civil de Bizkaia, no marco da Operación "Vacation Ludus". A mediados de marzo de 2023, axentes do instituto armado en territorio biscaíño tiveron coñecemento que unha persoa oriúnda de Bizkaia interpuxera unha denuncia en Gandía por un presunto delito de estafa.
Segundo a súa versión, alugara un piso ofertado por internet para pasar uns días na localidade valenciana tras abonar a reserva a través dunha pasarela de pagos a un número facilitado pola estafadora. Unha vez no lugar, descubriu que o aloxamento non se atopaba en aluguer. A vítima asegura que este feito lle causou "un grave prexuízo", non só económico, senón tamén persoal, xa que se desprazou desde Bizkaia ata a costa levantina e ao non ter aloxamento tivo que alugar outro en plena época estival. A situación repetiuse con outros estafados.
Os investigadores contactaron coas persoas que realizaran algunha transacción económica a través da pasarela de pagos a ese número de teléfono, e comprobaron que había vítimas en Bizkaia, Huelva, Badaxoz, Ourense, Cidade Real, Alacante e as Comunidades de Madrid e Cantabria.
Tras unha "complexa investigación" e mediante "enxeñaría inversa", os investigadores, lograron pescudar que a persoa que figuraba como titular da conta bancaria e do número de teléfono desde o que se cometían as estafas era tamén vítima da presunta autora, xa que utilizara os seus datos persoais para a contratación da liña e conta, e así empregala de pantalla.
Os gardas civís pescudaron a identidade da verdadeira autora, con antecedentes por delitos similares e localizaron o seu domicilio na provincia de Toledo. Á investigada atribúeselle un delito continuado de estafa e branqueo de capitais.
