Caldas reclama que a Xunta reforme o comedor CPI Alfonso VII despois dun incendio sen feridos

O Concello de Caldas de Reis reclamou á Consellería de Educación que acometa a renovación da instalación eléctrica do comedor escolar do CPI Alfonso VII despois do incendio declarado durante a hora da comida do mércores.

Segundo informou este xoves o goberno local de Caldas, o lume foi apagado polo persoal do centro sen que se producisen feridos. Tampouco foi necesaria a evacuación por un incidente que calcinou "conexións, enchufes e cabos".

O tenente de alcalde, Manuel Fariña, incidiu na necesidade de que a Consellería de Educación asuma a adecuación do espazo do comedor, que ocupa a antiga vivenda do conserxe, onde a instalación eléctrica "está formada por liñas e cabos de hai 50 anos" que dan soporte ás máquinas da cociña.

"O perigo está aí e hai que porlle solución de maneira inmediata. Non se poden correr riscos coa seguridade do alumnado", subliñou o edil do BNG, que incide en que a instalación "era para enceder catro loces" e agora dá servizo a mesas quentes e outros aparellos do comedor.

Así, censura a "calada por resposta" da Xunta ante as reclamacións de "ampliar e reformar o comedor". "Onte pasou o que se vía vir: unha sobrecarga eléctrica que prendeu lume", engadiu antes de lembrar que, aínda que corresponde ao concello o mantemento do centro, as obras "de gran calado" para liquidar este problema "son competencia" da Xunta.

"Estamos a falar dunha cuestión de seguridade. Nin se poden pór parches nin se pode mirar cara a outro lado. Hai que acometer unha actuación seria xa. Esperamos altura de miras para unha cuestión tan importante", aseverou o tenente de alcalde.

Casa do Concello de Caldas de Reis